Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Túrkııa Prezıdentiniń nazaryn aýdarǵan qazaqstandyq oqýshyǵa qurmet kórsetildi

2021 jyldyń 11 sáýir 2021 11:30

ÓSKEMEN. QazAqparat – Shyǵys Qazaqstan oblysy Tarbaǵataı aýdanynda 1-synypta oqıtyn Baıjigit esimdi balaqaı Túrkııa Prezıdentiniń nazaryna iligip, arnaıy syılyǵyn aldy. Buǵan onyń Rejep Taııp Erdoǵanǵa Abaı óleńin oqý estafetasyn joldaǵany sebep bolǵan. Jýyqta talapty jas órenge Nur-Sultan qalasyndaǵy Túrkııa Elshiliginde qurmet kórsetildi. QazAqparat tilshisine bul jaıly Baıjigittiń ákesi Dýlat Baıkýbenov aıtyp berdi.

«Balamnyń batyldyǵyna rıza boldym»

«Birde Baıjigit 9 jasar Láılim Rysqalı uly Abaıdyń óleńin jatqa oqyp, estafetany memleket basshysy Qasym-Jomart Toqaevqa joldaǵanyn kórip qalady. «Bul qalaı sonda?» dedi maǵan oıly keıipte. Túsindirip berdim. Tyńdap aldy da «Men de estafeta joldaımyn. Abaı atamnyń óleńin jattaımyn» dedi. «Kimge joldaısyń?» dep suraǵanymda, sál-pál oılanyp turdy da «Túrkııa Prezıdentine» dep jaýap qatty. Onyń bul batyldyǵyna rıza bolyp, qoldaý tanyttym», – deıdi Dýlat Baıkýbenov.




Sóıtip, hakimniń óleńi jattaldy, vıdeo túsirildi, jelige júkteldi. Aýyl turǵyndary ákeli-balaly ekeýiniń bul isine kúldi de qoıdy. Eshkim de Baıjigittiń sálemi Túrkııa basshysyna jetedi, qarshadaı balaǵa elordadaǵy Elshilikte úlken qurmet kórsetiledi dep oılamaǵan-tuǵyn.

«Arada 1 jarym jyldaı ýaqyt ótti. Senimge selkeý tússe de úmit úzilmegen. Kenet Anadoly elindegi TRT AVAZ telearnasynda biz jaıly sıýjet kórsetilgenin estidik. Basynda senbeı, ázil shyǵar dedik te qoıdyq. Sóıtsek, ras bop shyqty. Osydan keıin jan-jaqtan usynystar túse bastady. Naýryz aıynyń ortasynda Túrkııanyń Qazaqstandaǵy Elshiligi habarlasyp, ulym ekeýimizdi Nur-Sultan qalasyna shaqyrdy. Kelesi kúni ushaqqa otyrdyq ta elordaǵa tartyp kettik. Jol shyǵynyn Elshiliktiń ózi kóterdi», - dedi Dýlat.

Attanar aldynda olar Tuǵyl aýylyndaǵy tiginshi Álııa Nurahmetovaǵa baryp Baıjigitke arnaıy kıim tiktirgen eken.







Túrkııada tegin oqýǵa shaqyrdy

Jospar boıynsha Elshilikte Baıjigit Rejep Taııp Erdoǵanmen Zoom arqyly tikeleı baılanysqa shyǵýy kerek bolǵan. Alaıda Prezıdenttiń shuǵyl jumystary shyǵyp, bul oılary iske aspaı qalǵan.

«Bizdi Túrkııanyń Qazaqstandaǵy Elshisi Ýfýk Ekındjı myrza qabyldady. Erekshe yqylas tanytyp, shynaıy rızashylyqtaryn jetkizdi. Túrkııa Respýblıkasy Prezıdentiniń bas keńesshisi ıAlchyn Topchýdyń arnaıy haty, ipad mp3 player jáne Túrkııa týy bederlenip, «Baıjigit» degen jazýy bar altyn bilezikti syıǵa tartty. Budan bólek, Tarbaǵataı aýdanynyń ákimdigine Túrkııa týraly kitapty, Aqjar aýylyndaǵy Baıjigit baba meshitine Quran Kárim kitabyn bizge amanat etip tapsyrdy. Ulym mektep bitirgen soń Túrkııadaǵy kez kelgen ýnıversıtetke grantqa oqýǵa túse alatyndyǵyn, mamandyqty ózi tańdaıtyndyǵyn jetkizdi. Túrik tilin meńgerse sol elde jumysqa ornalasýǵa kómektesetindikterin de aıtty. Qýanyshymyzda shek bolmady! Bulaı bolatyndyǵy úsh uıyqtasaq ta túsimizge kirmegen», – dedi Dýlat.







Baıjigit óskende kásipker bolǵysy keledi eken. Óıtkeni, «kóp aqsha taýyp, jaǵdaıy joqtarǵa kómektesemin. Barlyq balaǵa telefon alyp beremin» deıdi. Osydan-aq onyń kóldeı kóńilin, ózgege degen janashyrlyǵyn ańǵardyq. Ákesi T.Rysqulov atyndaǵy mektepte tarıh pániniń muǵalimi.

«Jubaıym Gúlaıym ekeýimiz 4 bala tárbıelep otyrmyz. Baıjigit – tuńǵyshymyz. Erjigit, Janjigit esimdi eki inisi men Kerbez atty qaryndasy bar. Kenje qyzymyzdyń jaryq dúnıe esigin ashqanyna 2 aı boldy. Áıelim qazir dekrettik demalysta, negizgi mamandyǵy – aspaz. Aýylymyzǵa oralǵannan keıin jergilikti ákim men bilim bóliminiń basshysy kelip quttyqtady. Mektepte oqýshylarmen kezdesý uıymdastyryldy. Qazir 23 sáýir – Túrkııadaǵy balalar kúnine oraı túrikshe taqpaq jattap jatyrmyz. 15 maýsymda túrikter Tarbaǵataıǵa qonaqqa keledi. Soǵan da jaqsylap daıyndalamyz. Taǵy bir aıta keterligi, Anadoly jerindegi beldi kompanııalardyń biri Tarbaǵataıǵa qaıtarymsyz ınvestıtsııa bólip, sút óńdeý tsehyn salmaq. Bir sharttary daıyn ónimniń ataýy – «Baıjigit» bolýy kerek. Bul da týǵan jerimizdiń damýyna tıtteı de bolsa úles», – dedi tarbaǵataılyq.





Joǵary qaraı