Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Tusaýyn keskende tańdaǵany – kitap: Toǵyz jasar qyz bir jylda 100 kitap oqyǵan

2022 jyldyń 4 qańtar 2022 10:22

ÓSKEMEN. QazAqparat – Úsh-tórt kúnde bir kitap oqyp taýysatyn Alıma Sharypqannyń jasy – nebári 9-da. Qur oqyp qana qoımaı, mán-maǵynasyn sanaǵa túıip, oı qorytady. Qajet deseń hıkaıat jelisin jatqa aıtyp berýge daıyn. Kitapqumarlyqqa ájesiniń tárbıesi sebepker bolypty. Sonyń nátıjesinde ozat oqýshy A.S. Pýshkın atyndaǵy Shyǵys Qazaqstan oblystyq kitaphanasy uıymdastyrǵan «Kitap oqý kóshbasshysy» saıysynyń jeńimpazy atandy.

Alıma Sharypqan Óskemendegi Shákárim atyndaǵy №1 orta mektepte 3A synybynda oqıdy. Jas órenniń ákesi kólik jóndeýmen aınalyssa, anasy ınjener bolyp jumys isteıdi. Úıde ata-apasynyń tárbıesin kórip júrgen ol kitap oqýdy kún saıynǵy ádetine aınaldyrǵan.

- Kitap oqýdy apam úıretti. Jatarda ylǵı «Jeti laq» ertegisin oqyp beretin. Ol maǵan «kóp kitap oqysań áke-shesheń sekildi mektepti kileń bestikke aıaqtaısyń. Sosyn ýnıversıtetten qyzyl dıplom alyp shyǵasyń» dedi. Eń birinshi «Túımedaq» ertegisin oqydym. Óte qatty unady, - deıdi Alıma.

Osydan soń qyzyǵýshylyǵy oıanyp, únemi kitap oqı bastaǵan. Onyń ishinde «Jabaıy qazdar» men «Ybyraı atamnyń áńgimeleri» eń súıiktileriniń qatarynda. Balalar ádebıetiniń shetel klassıkteriniń qazaq tiline aýdarylǵan ertegilerin de erekshe yqylaspen oqıdy. «Hıkaıanyń sońy nemen aıaqtalar eken?» dep oqyp taýyspaıynsha taǵat tappaıdy.




- Alımamen áńgimeleskende kóp kitap oqıtynyn birden baıqaısyz. Til baılyǵy, oıyn anyq jetkizetindigi tańqaldyrady. Ádebıet pánine degen qyzyǵýshylyǵy zor. Mysaly, sabaq basynda «Balalar biz búgin osyndaı shyǵarmamen tanysamyz desem», Alıma turyp «Apaı, men ony ótkende oqyp tastaǵanmyn» deıdi. Esse jazǵan kezde de onyń jazǵanyn birden tanımyn. Kitap oqyǵannyń paıdasyn osydan-aq kóre berińiz! Alımadaı alǵyr oqýshyǵa rıza bolasyń, - deıdi synyp jetekshisi Ǵalııa Ahmetqalıeva.

Bir ǵajaby, Alıma tusaýyn keskende aldyndaǵy kóp zattyń ishinen kitapty tańdap alypty. Endi mine, sol bilim bulaǵyn qolynan tastamaı keledi. Tek qazaq tilinde emes, oryssha da, aǵylshynsha da kitaptar oqıdy. 9 jasar oqýshymen kezdeskenimizde onyń este saqtaý qabiletine tańdaı qaqtyq. Oqyǵan týyndylaryn qaz qalpynda aıtyp bere alady eken. Estı bergiń keledi.

2021 jyldyń sońynda A.S. Pýshkın atyndaǵy Shyǵys Qazaqstan oblystyq kitaphanasy «Kitap oqý kóshbasshysy» atty saıys uıymdastyrǵan. Kitapqumarlar dodasyna Shákárim atyndaǵy mekteptiń shákirti de qatysty. Jyl kóleminde 100 kitap oqyǵan qarshadaı qyz sondaǵy ádilqazylar alqasynyń ár týyndy jaıly suraqtaryna esh kidirmesten taqyldatyp turyp jaýap bergen. Sóıtip, biraýyzdan talaby taýdaı Alıma jeńimpaz bolyp tanyldy.

Bul otbasy men muǵalimder úshin úlken qýanysh bolǵany sózsiz. Synyptastary da mektepke kelgende ony qorshap alyp, «Sonshama kitapty qalaı oqyp taýystyń?» dep suraqtyń astyna alypty.




- Oqýshymyzdyń osyndaı jetistikke jetkeni jaıly Whatsapp messendjerindegi ata-analar tobyna bólisken edim. Al olar balalaryna «Kúni boıy telefonǵa telmirgenshe Alıma sııaqty kitap oqyǵanyń durys» dep aqyl aıtypty. Ózgege úlgi bolǵan qyzymyz synyptastarynyń ortasynda syıly, bárimen til tabysady. Balalar da odan bilmegenderin surap júredi. Birde «Beıneleý óneri» sabaǵynda «Bet-beınesinen jylylyq sezilip turatyn adam kim?» dep suraǵanymda «bizdiń Alıma» dep jaýap bergen balalardyń birin bári qostaı jónelgen-tuǵyn, - dedi Ǵalııa Ahmetqalıeva.

3A synybynda 24 bala bilim alady. Onyń 15-i qyz, 9-y ul. «Súıikti pánderiń qandaı?» dep suradyq Alımadan. «Ádebıet, matematıka jáne jaratylystaný» dep jaýap berdi. Al «Óskende kim bolasyń?» degenimizde:

- Rejısser bolǵym keledi. Teatrda spektakl qoısam deımin. Synyp jetekshimiz bizdi teatrǵa jıi aparyp turady. Sońǵy ret «Maýglı» ertegisine bardyq. Kitap oqýdan bólek, dombyra, sýret salý jáne aǵylshyn tili úıirmelerine qatysyp júrmin, - dep jaýap berdi Alıma Sharypqan.

P/S:

«Qazirgi balalar kitap oqymaıdy!» dep kópke topyraq shashýǵa bolmasyna kózimiz jetti. Qoshtasyp bara jatyp, bolashaǵynan zor úmit kúttiretin órenge izgi tilegimizdi arnadyq. Sol kezde kókeıimizge Qabdesh Jumadilovtyń «Kitap oqıtyn adam eshkimge qııanat jasamaıdy» degen sózi oraldy.





Joǵary qaraı