Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

UBT bastalǵannan beri 20 myńnan astam talapker test tapsyrdy

2022 jyldyń 24 mamyr 2022 15:59

NUR-SULTAN. QazAqparat - Negizgi UBT bastalǵannan beri 20 myńnan astam talapker test tapsyrdy. Onyń ishinde túlekterdiń 71,2% – y qazaq tilinde, 28,7% – y orys tilinde, 0,09% - y aǵylshyn tilinde testileýden ótti. Bul týraly QazAqparat Bilim mınıstrligine silteme jasap habarlaıdy.

Birinshi aptada UBT-ǵa erekshe bilim berý qajettiligi bar 69 bala qatysty. Aıta keteıik, bıyl erekshe qajettilikteri bar talapkerlerge arnalǵan test tapsyrmalaryn oryndaýǵa negizgi 240 mınýttan bólek qosymsha 40 mınýt berilgen. Sonymen qatar, olar úshin syzba jáne dıagrammalarsyz suraqtar jasaldy.

UBT-nyń alǵashqy aptasynda shekti baldy 69% - ǵa jýyq talapker jınady, bul ótken jyldyń kórsetkishterinen 5% - ǵa joǵary. Ortasha balǵa keletin bolsaq, ol 65 baldy qurady.

«Bıyl talapkerler negizgi UBT-ny eki ret tapsyryp, memlekettik bilim berý grantyn taǵaıyndaý konkýrsyna eń joǵary nátıjesin usyna alady. Bul túlekter úshin odan da yńǵaıly moraldyq jaǵdaıdy qamtamasyz etedi. Sonymen qatar, naýryz aıyndaǵy UBT-dan bastap engizilgen jeke taqyryptyq taldaý UBT-nyń ekinshi múmkindigine jaqsy daıyndalýǵa kómektesedi. Talapkerlerdiń jeke kabınetinde nátıjesi bar sertıfıkat qana emes, sondaı-aq ár pánnen barlyq taqyryp boıynsha taldaý qoljetimdi. Jeke taqyryptyq taldaý testilenýshige ár taqyrypty meńgerý deńgeıin túsinýge múmkindik beredi», – dep atap ótti QR BǴM Ulttyq testileý ortalyǵynyń dırektory Rýslan Emelbaev.

Jalpy negizgi ulttyq biryńǵaı testileýge qatysýǵa 290 myńǵa jýyq adam ótinish berdi. Esterińizge sala keteıik, memlekettik bilim berý grantyn taǵaıyndaý konkýrsyna qatysý úshin UBT 2022 jylǵy 16 mamyrda bastalyp, 5 shildege deıin jalǵasady. Bul rette talapkerler testileý orny men ýaqytyn ózderi tańdady.

Bıyl talapkerlerge yńǵaıly bolý úshin alǵash ret UBT-nyń kúnin, ýaqytyn, orny men beıindik pánderin eske salatyn SMS joldanatyn bolady. Habarlama UBT-ǵa qatysýshylardyń ózderine, sondaı-aq kámelettik jasqa tolmaǵan testilenýshilerdiń ata-analaryna nemese zańdy ókilderine jiberiledi.

Aıta keteıik, akademııalyq adaldyqty saqtaý maqsatynda talapkerlerdiń test nusqasy tańbalanatyn bolady. ıAǵnı UBT-nyń árbir qatysýshysynyń jeke test nusqasy bolady. Erejelerdi buzǵan jáne test tapsyrmalaryn aýdıtorııadan shyǵarýǵa talpynǵan jaǵdaıda Ulttyq testileý ortalyǵy ereje buzýshylardy anyqtap, olardyń nátıjelerin joıady.

Búgingi tańda 22 talapker smartfon, shpargalka jáne basqa da tyıym salynǵan zattardy alyp ótý áreketi saldarynan test tapsyrý múmkindiginen aıyryldy. Testileý kezinde erejelerdi buzǵany úshin aýdıtorııadan 21 adam shyǵarylyp, olardyń nátıjeleri joıyldy.

UBT-ǵa kirgizý úsh deńgeıli júıe boıynsha júzege asyrylady: Face ID jeke basyn sáıkestendirý arqyly, jeke kýálik boıynsha, sondaı-aq otyrǵyzý ornynda jeke basyn sáıkestendirý júrgiziledi. Bıyl testileý «1 kompıýter – 2 kamera – 1 testilenýshi» qaǵıdaty boıynsha ótedi. Eger buǵan deıin testileý protsesin ár kompıýterdiń joǵarǵy jaǵynan baqylap otyratyn bir kamera ǵana bolsa, endi testilenýshiniń jeke basyn sáıkestendirýge jáne bógde adamdardyń kirýine jol bermeýge múmkindik beretin ekinshi (frontaldy) kamera ornatylǵan.

Talapkerler testileý aıaqtalǵannan keıin 30 mınýt ishinde apellıatsııaǵa bere alady. Sertıfıkat apellıatsııa týraly sheshim qabyldanǵannan keıin testilenýshiniń jeke kabınetinde qoljetimdi bolady.


Basty sózder: UBT, QR Oqý-aǵartý mınıstrligi,
Joǵary qaraı