Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Úkimet eldi áleýmettik-ekonomıkalyq damytýdyń naqtylanǵan boljamyn maquldady

2021 jyldyń 20 sáýir 2021 10:10

NUR-SULTAN. QazAqparat – Búgin QR Úkimeti eldi áleýmettik-ekonomıkalyq damytýdyń naqtylanǵan boljamyn maquldady, dep habarlaıdy QazAqparat tilshisi.

«Qazaqstan ekonomıkasynyń jyl basynan beri ósýi boıynsha shuǵyl derekterdi jáne álemdik taýar naryǵyndaǵy jaǵdaıdy, sondaı-aq álemdik ekonomıkanyń ósý boljamdaryn esepke ala otyryp, Úkimet Áleýmettik-ekonomıkalyq damytýdyń 2021 jylǵa arnalǵan boljamynyń kórsetkishteri men ındıkatorlaryn qaıta qarady. Mysaly, 2021 jyly jalpy ishki ónimniń naqty ósýi – 3,1 paıyz deńgeıinde, munaı baǵasy – bir barrel úshin 50 dollar deńgeıinde, ulttyq valıýta baǵamy bir dollar úshin 425 teńge deńgeıinde boljanyp otyr. Osyǵan baılanysty respýblıkalyq bıýdjet jobasy Áleýmettik-ekonomıkalyq damýdyń naqtylanǵan boljamyn esepke ala otyryp qalyptastyryldy», -dedi Úkimet otyrysynda QR Premer-Mınıstri Asqar Mamın.

Onyń atap ótýinshe, 2021 jylǵa arnalǵan naqtylanǵan bıýdjet shyǵystarynyń negizgi baǵyttary «Nur Otan» partııasynyń baǵdarlamasyn jáne Memleket basshysynyń 2020 jylǵy 1 qyrkúıektegi Qazaqstan halqyna Joldaýyn iske asyrýdy qamtamasyz etý bolyp sanalady.

«Sonymen qatar bul shyǵystar pandemııamen kúres sharalaryn qarjylandyrýǵa jáne densaýlyq saqtaý júıesin jańǵyrtýǵa, sondaı-aq ekonomıkanyń naqty sektoryn yntalandyrýǵa baǵyttalǵan. Eger suraqtar bolmasa, usynylǵan Eldi áleýmettik-ekonomıkalyq damytýdyń naqtylanǵan boljamyn maquldaýdy jáne bıýdjetti naqtylaý boıynsha tıisti zań jobasyna jáne tıisti Jarlyq jobasyna daýys berýdi usynamyn», - dedi ol.

Úkimet bul usynysty biraýyzdan qoldap daýys berdi.


Joǵary qaraı