Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Úkimet Prezıdent Joldaýynan týyndaıtyn tapsyrmalardy oryndaýǵa kiristi

2021 jyldyń 2 qyrkúıek 2021 15:02

NUR-SULTAN. QazAqparat – Kúni keshe QR Prezıdenti Qasym-Jomart Toqaev Memleket basshysy laýazymyna saılanǵannan bergi úshinshi Joldaýyn jarııa etti. «Halyq birligi jáne júıeli reformalar – el órkendeýiniń berik negizi» atty Joldaýda el Úkimetine 70-ke jýyq naqty tapsyrma júktelgen. Osyǵan oraı búgin Mınıstrler kabıneti músheleriniń basyn qosqan Premer-Mınıstr Asqar Mamın birqatar mınıstrdiń Prezıdent tapsyrmalaryn oryndaý baǵytynda atqaratyn jumystaryn tyńdap, óz tarapynan da olarǵa mindetter júktedi.

Óńirler damıdy

Aldymen sóz tizginin alǵan QR Ulttyq ekonomıka mınıstri Áset Erǵalıev Memleket basshysynyń tapsyrmalaryn iske asyrý maqsatynda memlekettik qarjyny basqarý, ınflıatsııaǵa qarsy áreket etý, kásipkerlikti damytý, óńirlerdiń teńgerimdi damytý baǵyttary boıynsha jumys júrgizetinin aıtady. Baǵyttardy tarqatar bolsaq, memleket qarjysynyń tıimdiligin arttyrý maqsatynda Memleket qarjysyn basqarý tujyrymdamasy ázirlenbek. Tujyrymdama bıýdjet saıasatyn, memlekettik jáne kvazımemlekettik boryshty basqarý, sondaı-aq Ulttyq qordyń qarajatyn qalyptastyrýyn jáne paıdalanýyn basqarý máselelerin qamtıdy. Al bıýdjet qarjysyn basymdyqqa saı jumsaýdy qamtamasyz etý úshin «bloktyq» bıýdjetti jáne jańa bıýdjettik qaǵıdalardy, sondaı-aq bıýdjettik lımıtterdi bólýdiń obektıvti ádistemesin engizý kózdeledi.

«Mıkro jáne shaǵyn bıznes sýbektileri úshin eńbekaqy tóleý qorynan biryńǵaı tólem engiziledi. Bul osy tólemderdi esepteý men tóleý tártibin ońaılatýǵa, sondaı-aq eńbekaqy tóleý qoryna túsetin jalpy júktemeni 2023 jyldan bastap 34 paıyzdan 25 paıyzǵa deıin tómendetýge múmkindik beredi», - dedi Áset Erǵalıev.

Mınıstrdiń aıtýynsha, elimizdiń árbir óńiriniń básekelestik artyqshylyqtaryn aıqyndaıtyn is-sharalardy qamtıtyn óńirlik damýdyń jańa tásilderi ázirlenedi.

Ol úshin «Aglomeratsııalardy damytý týraly» Zań daıyndalady. Onyń aıasynda ortalyq qala men shetkeri aımaq arasynda fýnktsııalardy naqty bólý jolymen ınstıtýtsıonaldyq damytý kózdeledi. Biryńǵaı qala qurylysy aglomeratsııalaryn josparlaý engiziledi. Aýmaqtyq damý josparynda «Adamdardy – ınfraqurylymǵa» jaqyndatý qaǵıdaty bekitiledi. Bekitilgen jalpyulttyq mindetterge sáıkes, Óńirlerdi damytý josparlaryn jańartý da kózdelip otyr. Qarjylandyrý kólemi keminde 1 trln teńgeni quraıdy.

«Tutyný taýarlary baǵasynyń ósýin tejeý maqsatynda ınflıatsııaǵa qarsy áreket etý is-sharalarynyń kesheni ázirlenedi. Naryqty otandyq óndiristiń tutyný taýarlarymen molyqtyrýǵa baǵyttalǵan jedel jáne orta merzimdi is-sharalar qabyldanatyn bolady. Sondaı-aq aqsha-kredıt saıasaty men qarjy naryǵyn retteý is-sharalary kózdelgen», - dedi ol.

«Memleket basshysy óńirlik saıasatty jetildirýdiń mańyzdylyǵyn atap ótti. Elimizdiń árbir óńirinde ınfraqurylymdy jańǵyrtýǵa, ár óńirdiń ereksheligin eskere otyryp, halyqtyń turmys sapasy men tabysyn arttyrý úshin ózekti máselelerdi sheshýge baǵyttalǵan naqty jobalar iske asyrylatyn bolady. Ár memlekettik organ, árbir jergilikti atqarýshy organ Memleket basshysynyń tapsyrmalary men bastamalaryn oryndaýǵa dereý kirisýi qajet», - dedi osy oraıda Úkimet basshysy Asqar Mamın.


Moratorııge maldanǵandarǵa tyıym salynady

2020 jyldyń 1 qańtarynan bastap elimizde úsh jyl merzimge shaǵyn kásipkerlik sýbektilerine, onyń ishinde mıkro kásipkerlik sýbektilerine barý men tekserýge, profılaktıkalyq baqylaýǵa jáne qadaǵalaýǵa jarııalanǵan moratorıı kúshine engeni belgili. Kásipkerlik sýbektileri óz jumysy barysynda el zańnamasyn, jeke jáne zańdy tulǵalardyń quqyqtary men zańdy múddelerin saqtaýy, sondaı-aq QR zańnamasyna sáıkes taýarlardyń, jumystar men qyzmetterdiń qaýipsizdigi men sapasyn qamtamasyz etýi tıis. Bul mindettemelerdi kásipkerlik sýbektileri moratorıı kezeńinde de saqtaýy kerek bolatyn. Alaıda, moratorııge maldanǵan kásipkerlik sýbektileri salyqtan jaltarýdy daǵdyǵa aınaldyryp alǵan kórinedi. Muny Úkimet otyrysy barysynda QR Qarjy mınıstri Erulan Jamaýbaev ashyq aıtty jáne moratorıı alynyp tastalsa memlekettik bıýdjet kiristeriniń ulǵaıatynyna nazar aýdartty.

«Byltyr engizilgen tekserýlerge úsh jyldyq moratorıı kassalyq tártipti tómendetti. Josyqsyz kásipkerler bul bastamany salyqtan jazasyz jaltarý múmkindigi retinde qabyldaýda. Osyǵan baılanysty mıkro jáne shaǵyn bıznes sýbektilerin tekserýge moratorııdi alyp tastaý máselesin qarastyrýdy usynamyz», - dedi ol.

Sonymen qatar onyń aıtýynsha, jekeshelendirýdiń 2021-2025 jyldarǵa arnalǵan keshendi josparynyń ýaqtyly oryndalýyna baqylaýdy kúsheıtildi. Ol úshin nysandardy ótkizý tásilderi ázirlendi. Oǵan sáıkes nysandardyń 50 paıyzy osy jyly, 30 paıyzy 2022 jyly jáne 2023 jáne 2024 jyldary 10 paıyzdan satýǵa qoıylýy tıis. Budan basqa, keshendi jospardyń árbir nysany boıynsha ótkizý jol kartalary ázirlendi jáne Memlekettik múlik tizilimine engizildi. Óz kezeginde, jekeshelendirý josparynyń iske asyrylýyna jaýapkershilikti kúsheıtý maqsatynda, ákimdikterdiń, ulttyq basqarýshy holdıngter men kompanııalardyń qyzmetin baǵalaý kezinde onyń oryndalýyn eskerý usynylady. Osy usynylyp otyrǵan is-sharalar 2025 jyldyń sońyna qaraı memlekettiń ekonomıkaǵa qatysý úlesin jalpy ishki ónimniń 14 paıyzǵa deıin qysqartýǵa múmkindik bermek.

«Sonymen qatar, kvazımemlekettik sektor kompanııalarynyń birinshi basshylarynyń jaýapkershiligin normatıvtik turǵydan qarastyrý usynylady. Jaýapkershilik damý josparlarynda strategııalyq kórsetkishterge qol jetkizbegeni, onyń ishinde kvazımemlekettik kompanııalardyń shyǵynǵa ushyraýyna jol bergeni úshin kózdeletin bolady»,- dedi Erulan Jamaýbaev.

Aıtpaqshy, este bolsa, Memleket basshysy ótken jylǵy «Jańa jaǵdaıdaǵy Qazaqstan: Іs-qımyl kezeńi» atty Joldaýynda: «2021 jyldan bastap memlekettik qyzmetshilerdiń, depýtattardyń, sýdıalardyń shetel bankterinde esepshotqa ıe bolýy, qolma-qol aqsha jáne baǵaly zattar saqtaýyna qatysty jemqorlyqpen kúres aıasynda jańa shekteýler engizý kerek», - degen bolatyn. Bul baǵytta Qarjy mınıstrligi elimizdiń Ulttyq bankimen birlesip, tyńǵylyqty jumys istep jatqan kórinedi. Vedomstvo kapıtaldy shetelge shyǵarýǵa qarsy jáne ekonomıkany deofshorlaý boıynsha keshendi jumysty jandandyryp, osy jyly-aq 100-den astam ıýrısdıktsııadaǵy qazaqstandyqtardyń qarjylyq shottaryn qolǵa túsirmek.

«Ekonomıkalyq yntymaqtastyq jáne damý uıymymen jáne Ulttyq bankpen elektrondyq málimetter almasý aıasynda kópjaqty konventsııaǵa qol qoıdyq. Osy jyldan bastap 100-den astam ıýrısdıktsııada azamattarymyzdyń qarjylyq shottary boıynsha aqparat almasýdy bastaımyz. Sonymen qatar, transferttik baǵa belgileý zańnamasyn odan ári jetildirý josparlanýda», - dedi mınıstr.


Baspanany nebári 2 paıyzben alar kún týady

Talaı jannyń armany - «Óz úıim, óleń tósegim». Bul armannyń da shyndyqqa aınalar sáti alys emes sııaqty. Óıtkeni, Memleket basshysy keshegi Joldaýynda «Baspana hıt», «7-20-25» baǵdarlamalarynyń taıaýda aıaqtalatynyna baılanysty jańa Biryńǵaı turǵyn úı baǵdarlamasyn ázirleýdi tapsyrǵan bolatyn. Onyń sharttaryn, erejesin ázirleý bir kúnniń sharýasy emes ekendigi de túsinikti. Degenmen, qazirdiń ózinde baspanasyz júrgen talaı jannyń kóńiline úmit otyn uıalatar bul baǵdarlamanyń alǵashqy sulbasy da baıqalatyn sııaqty. Óıtkeni, Úkimet otyrysynda baıandama jasaǵan QR Indýstrııa jáne ınfraqurylymdyq damý mınıstri Beıbit Atamqulov aldaǵy ýaqytta ıpotekalyq nesıe «Otbasy» banki arqyly jyldyq mólsherlemesi 2 paıyzben beriletinin aıtyp otyr.

«Úı kezeginde turǵan azamattarǵa «Otbasy» bankiniń ıpotekalyq baǵdarlamalary boıynsha bastapqy jarna kólemi baspana qunynyń 10 paıyzyna deıin tómendetiledi. Otbasy tabysyna baılanysty jeńildikti nesıelendirý boıynsha mólsherleme jyldyq 2 paıyz jáne 5 paıyz bolady», - dedi mınıstr.

Sonymen qatar onyń atap ótýinshe, baspana jaǵdaıyn jaqsartýǵa zeınetaqy jınaqtaryn paıdalaný týraly qaǵıdalarǵa ózgerister kózdelgen. Soǵan sáıkes zeınetaqy jınaqtarynyń jetkilikti sheginen asatyn bóligin úı satyp alý úshin «Otbasy bankiniń» shotyna aýdarýǵa múmkindik beriledi. Qurylys salýshylardy qoldaý maqsatynda memlekettik-jekeshelik áriptestik jáne úlestik qurylys áleýetin paıdalanyp, jobalyq qarjylandyrý tetigi qolǵa alynady. Memlekettik qarajat esebinen salynatyn áleýmettik nysandarda 1 sharshy metr qurylystyń shekti qunyn belgileý usynylady. Halyqtyń jaıly ómir súrýine jaǵdaı jasaýǵa baǵyttalǵan Aýmaqtardy keshendi damytýdyń jańa standarttaryn ázirlenedi. Atalǵan standarttarǵa qala aýmaqtaryn keshendi damytý prıntsıpteri; qalalyq aýmaqtardy damytý standarty; bos aýmaqtardy ıgerý standarty; qalalardyń kelbetin qalyptastyrý standarty kiredi. Munan bólek, barlyq deńgeıdegi qala qurylysy saraptamasynyń biryńǵaı ınstıtýty engiziledi.

Otyrysty qorytyndylaǵan Premer-Mınıstr Asqar Mamın Memleket basshysynyń Joldaýyndaǵy barlyq baǵytty iske asyrý boıynsha Jalpyulttyq jospar daıyndalatynyn eskertti.

«Memlekettik organdarǵa Jalpyulttyq jospar boıynsha óz usynystaryn Ulttyq ekonomıka mınıstrligine 3 qyrkúıekke deıin engizýdi tapsyramyn. Ulttyq ekonomıka mınıstrligi Jalpyulttyq jospar jobasyn 4 qyrkúıekke deıin Premer-Mınıstrdiń keńsesine engizsin. Kelesi otyrysta biz ony qarap, Memleket basshysynyń bekitýine engizý úshin maquldaýymyz qajet», - dedi Úkimet basshysy.


Joǵary qaraı