Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Úkimettiń bıylǵy zań jobalaý jumysy qanshalyqty oryndaldy

2021 jyldyń 28 jeltoqsan 2021 10:02

NUR-SULTAN. QazAqparat – Úkimettiń 2021 jylǵa arnalǵan zań jobalaý jospary tolyq oryndaldy. Bul týraly búgin Úkimet otyrysynda QR Ádilet mınıstri Marat Beketaev aıtty, dep habarlaıdy QazAqparat tilshisi.

«Úkimettiń zań jobalaý jumystarynyń 2021 jylǵa arnalǵan jospary jıyrma bes zań jobasyn ázirleýdi jáne Parlament Májilisine engizýdi kózdeıdi. Qazirgi ýaqytta 25 zań jobasynyń beseýine Memleket basshysy qol qoıdy, bireýin Parlament qabyldady. 18-i Parlamenttiń qaraýynda. Bir zań jobasy búgingi otyrysta qaralyp, Parlamentke engiziledi. Jyl barysynda josparǵa Úkimettiń 4 qaýlysymen túzetýler engizildi», - dedi ol.

Mınıstrdiń atap ótýinshe, 3 zań jobasy boıynsha Úkimet pen Parlamentke engizý merzimderi aýystyryldy.

Bul - qoǵamdyq baqylaý, ınnovatsııalardy yntalandyrý jáne tsıfrlandyrýdy damytý máseleleri jónindegi zań jobalary. Úsh zań jobasynyń ataýlary ózgertildi.

«Jalpy sońǵy jyldary jospardyń oryndalýy oń serpindi kórsetip otyr. Bıyl josparǵa qosymsha zań jobalaryn engizý boıynsha túzetýler bolǵan joq. Atalǵan jospar tolyqtaı oryndaldy»,- dedi Marat Beketaev.


Joǵary qaraı