Aýa raıy
Astana 26 °S
Almaty 32 °S
valıýta baǵamy
USD 412.55
EUR 468.66
RUB 5.79
CNY 58.80

Ulttyq banktiń halyqaralyq rezervteri 32,9 mlrd dollarǵa jetti

2020 jyldyń 9 shilde 2020 13:36

ALMATY. QazAqparat– QR Ulttyq banki tóraǵasynyń orynbasary Álııa Moldabekova halyqaralyq rezervterdiń ósý sebebin túsindirip, Ulttyq qordyń valıýtalyq aktıvteri týraly aıtty, dep habarlaıdy QazAqparat tilshisi.

«Halyqaralyq rezervterdiń kólemi jyl basymen salystyrǵanda 3,9 mlrd dollar nemese 13,5% ósti. Aldyn ala málimetter boıynsha, maýsymnyń aıaǵynda rezervter 32,9 mlrd dollarǵa jetti, bir aı ishinde rezerv 1,3 mlrd dollarǵa artty. Bul dınamıka altyn baǵasy men valıýta aktıvteriniń ósýimen baılanysty boldy. Maýsym aıynda biz ekinshi deńgeıli bankterdiń Ulttyq banktegi shottaryna valıýtalyq qarajattyń túsýin baıqadyq», - dedi Álııa Moldabekova.

Onyń aıtýynsha, altyndy rezervtik aktıv retinde jınaqtaý aǵymdaǵy táýekelderdi eskere otyryp tolyqtaı negizdelgen. AQSh dollary álemdik rezervtik valıýta mártebesin saqtaıdy. Alaıda, ınvestıtsııalyq aktıv retinde altynǵa degen suranys artyp keledi. Jyl basynan beri altynnyń baǵasy bir ýntsııa úshin 1521 dollardan 1800 dollarǵa deıin nemese 18% qymbattaǵan.

Sońǵy málimetterge sáıkes, Ulttyq qordyń valıýtalyq aktıvteri maýsym aıynda 0,75 mlrd dollarǵa tómendep, 57,7 mlrd dollardy qurady.

«Transfertterdi respýblıkalyq bıýdjetke bólý boıynsha mindettemelerdi oryndaý maqsatynda Ulttyq qordyń aktıvterin shamamen 1,4 mlrd dollar nemese 577 mlrd teńgege satty», - dedi Álııa Moldabekova.

Maýsym aıynda Ulttyq qordyń ınvestıtsııalyq kirisi shamamen 690 mln dollardy qurady.

«Maýsymda munaı naryǵynda oń dınamıka baıqaldy. Nátıjıesinde teńge 1,7% nyǵaıdy»,– dedi ol.

Memleket basshysynyń tapsyrmasyna sáıkes, kvazımemlekettik sektordyń valıýta tabysynyń bir bóligin satý mindettemesi osy jyldyń sońyna deıin uzartyldy. Mindetteme 26 naýryzdan 30 maýsymǵa deıin engizilgen sátten bastap mindetti satý kólemi 612 mln dollardy qurady.


Avtor Alma Muqanova
Basty sózder: QR Ulttyq banki, Ekonomıka,
Joǵary qaraı