Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Zeınetaqy jınaǵyn turǵyn úı jaǵdaıyn jaqsartý úshin paıdalaný erejesi ózgeredi

2021 jyldyń 15 jeltoqsan 2021 13:54

NUR-SULTAN. QazAqparat – QR Indýstrııa jáne ınfraqurylymdyq damý mınıstriniń 2021 jylǵy 10 jeltoqsandaǵy buıryǵy boıynsha birjolǵy zeınetaqy tólemderin turǵyn úı jaǵdaıyn jaqsartýǵa paıdalaný qaǵıdalaryna ózgerister engizildi, dep habarlaıdy QazAqparat tilshisi.

«Arnaıy shot ashqannan keıin ótinish berýshi 2017 jylǵy 25 jeltoqsandaǵy «Salyq jáne bıýdjetke tólenetin basqa da mindetti tólemder týraly (Salyq kodeksi)» QR Kodeksiniń 351-1-babynda aıqyndalǵan arnaıy shottyń nómirin, paıdalaný maqsatyn, qoljetimdi somasyn, jeke tabys salyǵyn ustap qalý jáne aýdarý tásilderin kórsete otyryp, turǵyn úı jaǵdaılaryn jaqsartý úshin birjolǵy zeınetaqy tólemine arnalǵan elektrondyq ótinishterdi toltyrady», - dep jazylǵan buıryqqa engizilgen túszetýde.

Sonymen birjolǵy zeınetaqy tólemderi arqyly turǵyn úı jaǵdaılaryn jaqsartýdyń mynadaı sharalaryna jol beriledi:

1) turǵyn úıdi nemese jer ýchaskesin (nysanaly maqsaty - jeke turǵyn úı qurylysy nemese jeke qosalqy sharýashylyq) satyp alý-satý, aıyrbastaý (aıyrbastaý) sharttary boıynsha menshikke satyp alýǵa baılanysty azamattyq – quqyqtyq mámileler boıynsha, turǵyn úı qurylysyna úlestik qatysý týraly zańnamaǵa sáıkes kepildik bolǵan kezde nemese turǵyn úı qurylysyna úlestik qatysý týraly zańnamaǵa sáıkes kóppáterli turǵyn úıdegi úlesti berý týraly akt jasalǵan kezde túpkilikti esep aıyrysý (ıpotekalyq turǵyn úı qaryzyn resimdemeı);

2) bir banktik qaryz sharty sheńberinde turǵyn úıdi jáne (nemese) jóndeý júrgize otyryp turǵyn úıdi satyp alýǵa ıpotekalyq turǵyn úı qaryzyn alý úshin bastapqy jarna engizý, bir banktik qaryz sharty sheńberinde turǵyn úıdi jáne (nemese) jóndeý júrgize otyryp turǵyn úıdi satyp alýǵa arnalǵan turǵyn úı qaryzdaryn ishinara nemese tolyq óteý, ıpotekalyq turǵyn úı qaryzyn qaıta qarjylandyrý;

3) turǵyn úı satyp alýǵa (onyń ishinde bir banktik qaryz sharty sheńberinde jóndeý júrgizý úshin) nemese jeke turǵyn úı salýǵa (nysanaly maqsaty bar jer ýchaskesin satyp alýdy qosa alǵanda – jeke turǵyn úı qurylysy nemese jeke qosalqy sharýashylyq) ıpotekalyq turǵyn úı qaryzyn alý (qaıta qarjylandyrý) maqsatynda turǵyn úı qurylysy jınaq aqshasyna salymdy tolyqtyrý (onyń ishinde odan ári jınaqtaý úshin).

Bul rette, syıaqy mólsherlemesin jáne memleket syılyqaqysyn esepteý jáne (nemese) qaıtarý turǵyn úı qurylysy jınaq aqshasy týraly zańnamaǵa sáıkes júzege asyrylady;

4) turǵyn úıdi satyp alýǵa (onyń ishinde bir banktik qaryz sharty sheńberinde jóndeý júrgizýge) nemese jeke turǵyn úı salýǵa (nysanaly maqsaty jeke turǵyn úı qurylysy nemese jeke qosalqy sharýashylyq bolatyn jer ýchaskesin satyp alýdy qosa alǵanda) turǵyn úı qurylys jınaqtary júıesi boıynsha alynǵan ıpotekalyq turǵyn úı qaryzy boıynsha bereshekti ishinara nemese tolyq óteý;

5) ıslam bankiniń qarjylandyrýy sheńberinde turǵyn úıdi satyp alý, ıslam bankiniń turǵyn úı satyp alý jónindegi mámileni qarjylandyrýy sheńberinde bereshekti ishinara, tolyq óteý;

6) turǵyn úı qurylysy baǵdarlamalary nemese daǵdarysqa qarsy baǵdarlamalar sheńberinde berilgen satyp alý quqyǵymen turǵyn úıdi uzaq merzimdi jaldaý sharttary boıynsha tóleý, jekeshelendirý, tólemdi bólip-bólip satyp alý-satý;

7) jeke turǵyn úı qurylysy (menshiginde nysanaly maqsaty jeke turǵyn úı qurylysy nemese jeke qosalqy sharýashylyq bolatyn jer ýchaskesi bolǵan kezde).

«Ipotekalyq turǵyn úı qaryzynyń mindettemeleri boıynsha birjolǵy zeınetaqy tólemderin paıdalanýǵa satyp alynǵan (satyp alynatyn) turǵyn úı múlki ótinish berýshiniń, onyń jubaıynyń (zaıybynyń) nemese jaqyn týystarynyń menshigi bolyp tabylǵan jaǵdaıda jol delingen qujatta.

Buıryqtyń tolyq nusqasyn myna jerden oqýǵa bolady.

Eske salaıyq, 2022 jyldyń 1 qańtarynan birjolǵy zeınetaqy tólemin alýdyń jetkiliktilik shegi 1,8 ese kóteriletini málim etilgen bolatyn. QR Eńbek jáne halyqty áleýmettik qorǵaý mınıstrliginiń baspasóz hatshysy Aleksandr Kononets atalǵan shekti mólsher nelikten arttyrylatynyn túsindirdi.

Keıin zeınetaqy jınaǵyn paıdalanýǵa qatysty enpf-otbasy.kz platformasyna úsh kún ishinde ótinishterdiń rekordtyq sany joldanǵany aıtyldy.

QR Indýstrııa jáne ınfraqurylymdyq damý mınıstrliginiń baspasóz qyzmeti zeınetaqy jınaǵyn «Otbasy bank» depozıtine aýdarý múmkindigin túsindirdi.

Búgin senator Nurlan Qylyshbaev Premer-Mınıstr Asqar Mamınniń atyna joldaǵan depýtattyq saýalynda zeınetaqy jınaǵyn paıdalanýǵa qatysty jetkiliktilik shegin arttyrý máselesin kóterdi. Depýtat Memleket basshysy zeınetaqy esep-shotynan artyq jınaqty alýǵa múmkindik beriletin azamattar sanatyn birtindep ulǵaıtýdy tapsyrǵanyn eske saldy. Senator qazirgi tańda jetkiliktilik somalaryn kóterý taqyryby qoǵamda qyzý talqylanyp jatqanyn atap ótti. Keıin QR Prezıdenti shekti mejeni 2022 jyldyń 1 sáýirine deıin kótermeýdi tapsyrdy. Sondaı-aq zeınetaqy jınaǵyn banktegi depozıtke aýdarǵan soń úsh jyl ishinde turǵyn úı zaemyn resimdeý qajet.



Joǵary qaraı