Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Jahandyq sammıt: QR Prezıdenti bıologııalyq qaýipsizdik halyqaralyq agenttigin qurýdy usyndy

2021 jyldyń 22 qyrkúıek 2021 22:21

NUR-SULTAN. QazAqparat - Qazaqstan Prezıdenti Qasym-Jomart Toqaev BUU Bas Assambleıasynyń joǵary deńgeıdegi 76-shy sessııasy aıasynda «Pandemııany toqtatyp, qaıta jańǵyrýdy jaqsartý» dep atalǵan COVID-19 pandemııasyna qarsy kúreske arnalǵan Jahandyq sammıtte sóz sóıledi, dep habarlaıdy QazAqparat Aqordanyń resmı saıtyna silteme jasap.

Memleket basshysy óz sózinde álem sońǵy onjyldyqtarda densaýlyq saqtaý salasynyń buryn-sońdy bolmaǵan ǵalamdyq daǵdarysyna ushyraǵanyn atap ótti. Sonyń saldarynan týyndaǵan ekonomıkalyq qıyndyqtar teńsizdikterdi arttyrdy jáne ǵalamdyq qoǵamdastyqtyń sharasyzdyǵyn kórsetti.

– Qalyptasqan jaǵdaı jan-jaqty ári naqty sharalar qabyldaýdy talap etedi. Bizdiń basty mindetimiz – shuǵyl túrde vaktsınaǵa jahandyq qoljetimdilikti arttyrý bolýy kerek dep oılaımyn. Bul ǵalamdyq etıka men birliktiń máselesi. Óıtkeni vaktsınalarǵa qol jetkizýdegi ádiletsizdik halyqtyń densaýlyǵyna nuqsan keltirip qana qoımaı, qoǵamdaǵy alshaqtyqty odan ári ulǵaıta bermek. Biz vaktsınalardyń eki mıllıardtan astam dozasymen qamtamasyz etýge jáne densaýlyqqa tóngen jahandyq qaterlerden ujymdyq qorǵanysty jaqsartýǵa baǵyttalǵan jan-jaqty kúsh jumyldyrýdy quptaımyz. Dúnıejúzilik «ujymdyq ımmýnıtetke» úles qosa otyryp, Qazaqstan QazVac vaktsınasyn jasaý arqyly ekpe oılap tapqan álemdegi alǵashqy on eldiń qataryna endi, – dedi Qazaqstan Prezıdenti.

Qasym-Jomart Toqaev jýyrda QazVac koronavırýstyń delta shtammyna tótep bere alatyndaı kúsheıtilgenin, búginde Qazaqstan halqynyń 31 paıyzy ekpeni tolyq alǵanyna toqtaldy. Sonymen qatar azamattarymyzdyń erkin tańdaý jasaýy úshin vaktsınanyń birneshe túri jetkilikti deńgeıde usynylǵany týraly aıtty.

– Osy sammıttiń paıdaly ıdeıalary men maqsattaryn júzege asyrý úshin biz naqty ishki josparlarymyz ben mindettemelerimizdi ázirledik. Qazaqstanda ulttyq bıologııalyq qaýipsizdik júıesin qurýdyń zańnamalyq negizi ázirlengen. Biz halyqaralyq standarttarǵa sáıkes keletin bıologııalyq qaterlerdi boljaýǵa arnalǵan keshendi ári joǵary tehnologııalyq qurylym jasaqtaýǵa umtylamyz. AQSh basshylyǵynyń kúsh-jigeri men Prezıdent Baıdenniń «Álemdi jaqsartý» jahandyq bastamasy aıasynda seriktestikti damytý arqyly ujymdyq is-qımyldardy qamtamasyz etýge umtylysyn joǵary baǵalaımyz. Sondyqtan Qazaqstan Sizdiń usynyp otyrǵan mindetterdi bekitý týraly kózqarasyńyzben kelise otyryp, osy maqsatqa qol jetkizý úshin óz úlesin qosýǵa daıyn, – dedi Memleket basshysy.

Prezıdent tájirıbe men ǵylymı zertteýlerge súıene otyryp, keshendi sharalardy júzege asyrý jóninde birqatar bastama kóterdi.

– Biz ǵalamdyq deńgeıdegi áleýetti arttyrýǵa nazar aýdarýymyz kerek. Dúnıejúzilik densaýlyq saqtaý uıymy bekitken alǵashqy medıtsınalyq-sanıtarlyq kómek salasyndaǵy Almaty deklaratsııasynyń negizgi qaǵıdattaryn nasıhattaý qajet. Biz bolashaqta bıologııalyq apattar men daǵdarystardyń aldyn alý úshin kúsh biriktirýimiz kerek. Osyny eskere otyryp, byltyr men Bıologııalyq qaýipsizdik jónindegi halyqaralyq agenttik qurý týraly bastama kóterdim. Barlyq múddeli taraptarmen tájirıbelik konsýltatsııalar júrip jatyr. Biz seriktesterdi osy bastamany qoldaýǵa shaqyramyz, – dedi Qasym-Jomart Toqaev.

Memleket basshysy jahandyq týrızm men bızneske COVID-19 pandemııasymen kúreste kómektesý úshin vaktsına sertıfıkattaryn ózara moıyndaý baǵytynda jumys isteý mańyzdy ekenin atap ótti.

– Medıtsınalyq sertıfıkattar pandemııadan keıingi kezeńde jumysty qaýipsiz qaıta qalpyna keltirýge, ekonomıkanyń tez ońalýyna jáne jańa jumys oryndarynyń ashylýyna yqpal etedi. Biz COVID-19 vaktsınalaryna degen senimdi arttyrý úshin áleýmettik jelilerdiń quraldaryn qoldanýymyz kerek. Mass-medıadaǵy ǵylymı negizdelgen aqparattardyń tapshylyǵynan qoǵamda kúmán nemese senimsizdik bar. Biz halyqtyń vaktsınaǵa degen senimin arttyrý úshin túsindirý jumystarynda naqty derekterge súıenýimiz kerek.

Biz shynymen de jaqsy álem qurýymyz kerek, sonymen qatar ádil, ornyqty, ekologııalyq taza jáne izgilikke negizdelgen «jańa álem» qalyptastyrǵan abzal, – dedi BUU sammıtinde sóılegen sózinde.


Basty sózder: Aqorda,
Joǵary qaraı