Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Jalpyǵa birdeı deklaratsııa: 2022 jylǵy formanyń aıyrmashylyǵy qandaı

2022 jyldyń 26 qańtar 2022 21:36

NUR-SULTAN. QazAqparat – QR Qarjy mınıstrligi Memlekettik kirister komıtetiniń «Baılanys ortalyǵy» basqarmasy basshysynyń orynbasary Aınur Sartaeva 2022 jyly jeke tulǵalar úshin deklaratsııalaýdyń ótken jyldan aıyrmashylyǵy nede ekenin túsindirdi, dep habarlaıdy QazAqparat.

«2021 jyly jalpyǵa birdeı deklaratsııalaýdyń birinshi kezeńi bastaldy. Birinshi kezeńde memlekettik qyzmetshiler jáne olarǵa teńestirilgen adamdar, olardyń jubaılary jáne kvazımemlekettik sektor uıymdarynyń basshylary óz aktıvteri men mindettemeleri týraly deklaratsııa usynǵan edi. Endi 2022 jyly dál osy adamdar basqa formada – «Kirister men múlik týraly deklaratsııa» 270.00 formasyn usynýy kerek. Ol byltyrǵy 250.00 formasynan nesimen erekshelenedi? Byltyrǵysy deklaratsııanyń bastapqy formasy boldy, onda múlik, sonyń ishinde shetelde, sheteldik bankterdegi shottar jáne qolma-qol aqsha kórsetilgen. Al bıyl deklaranttar kúntizbelik jyl ishinde alynǵan kirister týraly, olarǵa qoldanylǵan salyq shegerimderi, múlikti satyp alý nemese ıelikten shyǵarý týraly málimetter, sheteldik bankterdegi bank shottaryndaǵy aqsha týraly aqparat berýi tıis», – dedi A. Sartaeva.

Óz sózinde spıker Qazaqstan zańnamasynda memlekettik qyzmetshilerdiń jubaılaryna jeke kásipker, kommertsııalyq uıymdardyń basshylary retinde qyzmet etýine tyıym salynbaıtynyn atap ótti.

Onyń aıtýynsha, birinshi kezeńdegi jeke tulǵalar 270.00 formasyndaǵy deklaratsııany: elektrondyq túrde – 2022 jylǵy 15 qyrkúıekten keshiktirmeı; qaǵaz tasyǵyshta – 2022 jylǵy 15 shildeden keshiktirmeı tapsyrýy tıis. Kirister men múlik týraly deklaratsııany elektrondy túrde «Salyq tóleýshiniń kabınetinde» (kgd.gov.kz) jáne eSalyq Azamat mobıldi qosymshasy arqyly jiberýge bolady.

«Ótken jyly deklaranttar elektrondy deklaratsııany 2-3 mınýt ishinde toltyrdy, bul joǵaryda kórsetilgen qosymshalardy paıdalanýdyń jeńildigin kórsetedi», - dedi Aınur Sartaeva.


Joǵary qaraı