Aýa raıy
Astana 12 °S
Almaty 12 °S
valıýta baǵamy
USD 421.58
EUR 496.83
RUB 5.53
CNY 62.20

Jaman úıdi qonaǵy bıleıdi – Abaev mıtıngilerge sheteldikterdi qatystyrý jaıly

2020 jyldyń 30 sáýir 2020 21:16

NUR-SULTAN. QazAqparat – QR Aqparat jáne qoǵamdyq damý mınıstri Dáýren Abaev Parlament Senatynda qaralyp jatqan beıbit jınalystar týraly zań jobasyna qatysty taǵy pikirin bildirdi, dep habarlaıdy QazAqparat tilshisi.

Aıta ketsek «Ashyq dıalog» baǵdarlamasynda mınıstrge «Beıbit jınalystar týraly zań jobasy halyqaralyq standarttarǵa áli de saı emestigi týraly adam quqyǵyn qorǵaý uıymdary syn aıtýda. Buǵan qatysty ne aıtar edińiz?» degen suraq qoıyldy.

«Eń aldymen, adam quqyǵyn qorǵaý uıymdarynyń bári de bul pozıtsııany ustap otyr dep aıta almas edim. Iá, zań jobasyn júıeli túrde synap kele jatqandary bar. Keıde solar úshin bárin burynǵy qalypta qaldyryp, 1995 jylǵy zańmen ómir súre bergen yńǵaıly bolar ma edi degen sezim de týyndaıdy. Áıtse de, zań jobasynyń progressıvtiligin sanaly túrde shetteý – menińshe, burys strategııa. Sebebi zań daıyndaý – saýda isi emes. Biz Úkimet atynan ulttyq múdde, ulttyq qaýipsizdikti, el aýmaǵynyń tutastyǵyn saýdaǵa salyp otyrǵan joqpyz», - dedi mınıstr.

Dáýren Abaev óz sózinde quqyq mamandarynyń keıbiri shetel azamattaryna mıtıngilerge qatysý quqyǵyn berý týraly usynys bildirip jatqanyn eske aldy.

«Álbette, bárin túsinip otyrmyz. Tipti halyqaralyq statýttardyń da osyny talap etip otyrǵanyna habardarmyz. Degenmen, qazaqta «jaman úıdi qonaǵy bıleıdi» degen jaqsy sóz bar. Biz árıne, qonaǵyn qudaıdaı syılaǵan halyqpyz. Biraq, qonaq qoıdan jýas bolýy kerek», - dedi ol.

Mınıstr zańdy qabyldaý máselesinde qaýipterdiń bárin, eldiń ereksheligin, aýmaqtyq jaǵdaıyn, halyqtyń saıası mádenıeti men qurylymyn, etnostyq quramy men dinin, konfessııasyn eskerý kerektigin aıtyp ótti.

«Meniń oıymsha, sheteldikterge mıtıngke qatysý quqyǵyn berý – áli erte. Alaıda, osynaý jaǵdaıda kóńilge kirbińdi basqa jaı uıalatady: osy áńgimelerdiń artynda zań jobasyna engizilgen óte mańyzdy jańashyldyqtar kórinbeı qaldy. Eń bastysy – eskertý tártibi engizildi. Bul progres emes pe? Endi mıtıng ótkizý úshin tek eskertý jazsańyz bolǵany. Eshqandaı ruqsat alýdyń qajeti joq. Beıbit jıyndardy ótkizýde prezýmptsııa qaǵıdaty engizildi. Zańmen tikeleı ótkizýge tyıym salynǵan jerden basqa pıketterdi kez kelgen orynda ótkizý quqyǵy berildi. Eskertýdi berýdiń merzimi qysqartyldy. Mıtıngke qatysýshylardyń sany boıynsha shekteýlerdiń bári alynyp tastaldy. Sol sebepti zań jobasyna jalpy kózqaraspen qarap baǵa bergen abzal», - deıdi Dáýren Abaev.


Joǵary qaraı