Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Jambyl oblysynda balyq ósirýshiler qaýymdastyǵy qurylady

2021 jyldyń 12 sáýir 2021 05:40

TARAZ. QazAqparat – Jambyl oblysynda keıingi jyldary balyq sharaýashylyǵyna aıryqsha kóńil bólinýde. Degenmen búgingi tańda óńirdegi bul salada birqatar másele týyndap otyr. Ol týraly oblys ákimi Berdibek Saparbaevtyń tóraǵalyǵymen ótken keńeste jan-jaqty saralandy, dep habarlaıdy QazAqparat tilshisi.

«Oblysymyzda balyq sharýashylyǵyn damytýdyń bolashaǵy zor. Ol úshin bizdegi tabıǵı-klımattyq jaǵdaılardyń qolaılyǵy jáne memlekettik qoldaýdyń múmkindigi mol. Úkimet 2030 jylǵa deıingi arnaıy baǵdarlamany ázirledi. Balyq ósirýmen aınalysatyndar úshin sýbsıdııanyń bes túri qarastyrylǵan. Sonymen qatar, bizdiń oblysta balyq ósirýdiń Keńes zamanynan qalyptasqan jaqsy dástúrleri bar degenimizben, qazirgi kezde bul sala is júzinde naqty damýda dep aıta almaımyz. Osy turǵyda ótken jyly óndiris kólemi nebary 1150 tonnany quraǵany – sonyń aıǵaǵy», - dedi Berdibek Saparbaev.

Aımaq basshysynyń aıtýynsha, bıyl oblysta 1500 tonna, al kelesi jyly 2500 tonna taýarly balyq óndirý josparlanǵan bolatyn. Oblys ákimi mundaı tómen qarqynmen 2030 jylǵa qaraı túpkilikti nátıjege qol jetkizýdin qıyndyǵyn basa aıtty. Osyǵan oraı jylyna 10 myń tonna taýarly balyq óndirý kózdelýde.

Tabıǵı resýrstar jáne tabıǵatty paıdalanýdy retteý basqarmasynyń basshysy Aslan Orazbekov bul salada basymdyq taýarly balyq pen forel ósirýge beriletinin tilge tıek etti.

«Oblysta taýarly balyq ósirýge jaramdy 27 sý qoımasy bar, olarmen kelesi jyly 22,6 tonna balyq óndirý josparlanǵan. Bıyl taýly ózenderde ornalasqan 21 sharýa qojalyqtan 83,3 tonna forel aýlaý josparlanyp otyr»,-dedi ol.

A.Orazbekovtyń aıtýynsha, qazir kezde óńirde «Sandel» sharýa qojalyǵy men «A.D.Chergenov» JK pıtomnıkteriniń óndiristik qýaty artyp keledi. Ótken jyly «Sandel» eki mıllıon dana shabaq óndirse, «A.D. Chergenov» JK tórt myń dana shabaq pen úsh mıllıon dernásil shyǵarǵan. Bıyl ónim kólemin ulǵaıtý maqsatynda «Sandel» sharýashylyǵy quny toǵyz mıllıon teńge, aýdany eki gektar bolatyn toǵan salý jumystaryn júrgizýde. Onda alty mıllıon dana shabaq ósirý josparlanyp otyr. «Qoıshybaı-Ata» sharýa qojalyǵy men pıtomnık salynyp, onda mıllıon shabaq ósirilmek.

A.Orazbekov qaıta óńdeý tsehtaryn, sonymen qatar balyq jemin óndiretin óndiris oryndaryn ashý qajettigin atap ótti.

Basqosý barysynda balyq ósirýge jer telimderin berý, asyl tuqymdy balyq sharýashylyǵyn damytý sekildi ózekti máseleler de saralandy.

Oblys ákimi balyq ósirýshilerdiń ótinishteri men usynystaryn muqııat tyńdap, aımaqtaǵy balyq sharýashylyǵyna qajetti barlyq qoldaý kórsetiletinine sendirdi.

«Búgin kóptegen utymdy usynystar jasaldy. Olardyń eshbiri eskerýsiz qalmaıdy. Biz sý qoımalaryn tek balyq kózi retinde qarastyrmaýymyz kerek. Olardy otbasylyq demalys oryndaryna, balyq aýlaýǵa arnalǵan jáne t.b. týrıstik nysandarǵa aınaldyrýǵa bolady. Bul balyq sharýashylyǵyn da, týrızmdi de damytýǵa múmkindik beredi», - dedi B. Saparbaev.

Aımaq basshysy balyq ósirýmen aınalysatyn kásipkerler birigip, ózderiniń qaýymdastyǵyn qurýy kerek ekenin basa aıtty. Bul is-áreketterdi úılestirýge jáne týyndaǵan máselelerdi birlesip sheshýge yqpal etedi. Berdibek Saparbaev tabıǵı resýrstar jáne tabıǵat paıdalanýdy retteý basqarmasynyń basshysy Aslan Orazbekovke qaýymdastyq qurýdy, al óziniń orynbasary Berik Nyǵmashevqa ınvestorlar alǵan jer telimderge qatysty barlyq máselelerdi sheshýdi tapsyrdy.




Joǵary qaraı