Aýa raıy
Astana 6 °S
Almaty 17 °S
valıýta baǵamy
USD 421.58
EUR 496.83
RUB 5.53
CNY 62.20

Jambyl oblysynda pnevmonııamen aýyrǵandar sany 2,6 esege tómendedi

2020 jyldyń 5 tamyz 2020 09:14

TARAZ. QazAqparat – Jambyl oblysynda qolǵa alynǵan is-sharalar nátıjesinde, sońǵy aptada, ıaǵnı, 28 shilde - 4 tamyz aralyǵynda pnevmonııamen aýrýshańdyq 2,6 ese tómendegen.

Bul týraly búgin óńirlik kommýnıkatsııalar qyzmeti alańynda ótken brıfıngte oblys ákimdigi densaýlyq saqtaý basqarmasynyń basshysy Marat Jumanqulov aıtty, - dep habarlaıdy QazAqparat tilshisi.

Aǵymdaǵy jyldyń 4 tamyzy boıynsha Jambyl oblysynda koronavırýs indetin juqtyrǵandar sany 3863 adamǵa jetti. 100 myń turǵynǵa shaqqanda aýrýshańdyq kórsetkishi 318,4 aınalsa, táýliktik ósim 1,3 paıyzdy (47 jaǵdaı) quraǵan.

Densaýlyq saqtaý basqarmasy basshysynyń aıtýynsha, tirkelgen jaǵdaılardyń ishinde 1589 naýqas sımptommen, 2094 naýqas sımptomsyz. Búginge deıin ınfektsııalyq statsıonardan 3004 azamat saýyǵyp shyqty.

«Jalpy oblysta koronavırýs indetin emdeý jáne oqshaýlaý sharalaryn uıymdastyrý maqsatynda 2030 tósekqory jasaqtalǵan. Qazirgi tańda ınfektsııalyq statsıonarda – 199 adam emdelýde. Bul oraıda tósek-oryn júktemesi 29,7 paıyzdy qurap otyr. Reanımatsııa bóliminde 48 naýqas jatsa, IVL apparatynda jatqandar-12, ottegige qosylǵandar — 93 adam. Provızorlyq statsıonarda – 295 emdelýshi jáne úı jaǵdaıyndaǵy karantınde – 1621 adam bar. Aıta keteıik, aǵymdaǵy jyldyń 7 aıynda 12869 adam pnevmonııamen aýyrǵan. Ótken jyldyń tıisti kezeńimen salystyrǵanda ósim 38,1 paıyzdy quraǵanymen, atqarylǵan is-sharalar nátıjesinde, sońǵy aptada 28 shilde – 4 tamyz aralyǵynda pnevmonııadan aýrýshańdyq 2,6 ese tómendedi», - deıdi Marat Jumanqulov.

Budan bólek, aımaqta jedel járdem shaqyrtýlar sany táýligine – 1239-di qurap, salystyrmaly túrde 11,4 paıyzǵa kemigen. Onyń ishinde KVI indetimen 2 ese, pnevmonııamen shaqyrtýlar 2,4 esege tómendegeni belgili bolyp otyr.

Sondaı-aq, spıker óńirde medıtsınalyq buıymdar men qajetti preparattar jetkilikti ekendigin tilge tıek etti. Qazirgi tańda 69 958 dana kostıýmder, 424 198 dana bir rettik maska, 42 509 respırator, 302 451 bir rettik qolǵap, 230 vırýsqa qarsy preparat, 71 847 antıseptık jáne dezınfektsııalyq zattardyń qory bar. Medıtsınalyq mekemelerdegi jeke qorǵaný quraldarynyń qory ortasha eseppen 42 kúnge jetkilikti eken.


Joǵary qaraı