Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Jambyl oblysynda «Rýhanı jańǵyrý» baǵdarlamasyn jastar tárbıesinde paıdalaný usynyldy

2022 jyldyń 19 qańtar 2022 00:24

TARAZ. QazAqparat – Jastar – elimizdiń erteńi. Memleketimizdiń bolashaǵy jarqyn bolýy úshin búgingi óskeleń urpaqtyń tárbıeli ári bilimdi bolyp qalyptasýy shart. Oblys ákimi Berdibek Saparbaev zııaly qaýym, din ókilderi, sportshylar jáne jastarmen kezdesýinde osylaı dedi, dep habarlaıdy QazAqparat tilshisi.

Aımaq basshysy oryn alǵan jappaı tártipsizdiktiń saldary eshkimge ońaı tımegenin, búlikke qatysqandardyń basym bóligi jastar ekenine toqtaldy.

«Memleket basshysynyń tapsyrmasyna sáıkes, qazir elimizde, óńirimizde qoǵamdyq tynyshtyqty qamtamasyz etý boıynsha naqty sharalar qolǵa alynyp, jaǵdaı turaqtaldy. Men osy rette aımaqtaǵy ahýaldy qalypqa keltirý jolynda jumyla jumys jasap jatqan quqyq qorǵaý, kúshtik qurylymdarǵa úlken alǵysymdy aıtqym keledi.

Sondaı-aq, tártipsizdikter kezinde aldyńǵy qatardan tabylyp, elge basý aıtyp, tártipke shaqyrýǵa atsalysqan zııaly qaýym, din ókilderine, belsendi jastar men sportshylarǵa rızashylyǵymdy jetkizgim keledi.

Arandatýshylar, qylmyskerler bizdiń jastardy paıdalanyp ketkeni ókinishti. Aldaǵy ýaqytta mundaıǵa jol bermes úshin jastar tárbıesimen júıeli aınalysý kerek.




Áleýmettik máselelerdi sheshý, halyqtyń tabysyn arttyrý boıynsha el Prezıdenti Qasym-Jomart Toqaevtyń júktegen mindetteri men tapsyrmalaryn júzege asyrý úshin óńirde keshendi jospar ázirlenýde», - dedi oblys ákimi.

Kezdesýde sóz alǵan ózge de qatysýshylar ózderiniń oramdy oılary men usynystaryn ortaǵa saldy.

Oblystyq máslıhattyń hatshysy Mahmetǵalı Sarybekov zııaly qaýymnyń jastar tárbıesindegi róline toqtaldy.

«Shynyn aıtý kerek, qazirgi zııaly qaýymnyń jastar tárbıesindegi jumystary óz nátıjesin berip otyr dep aıta almaımyz. Jastar olardy tyńdaýǵa qulyqsyz. Kúni keshegi oqıǵalar oǵan kózimizdi jetkize tústi. Bizge bedeldi zııaly qaýym, ardagerlerdiń ókilderinen turatyn arnaıy top jasaqtaý kerek. Buryńǵy ata-babalarymyz aıtqandaı, «Aýzynyń dýasy bar» tulǵalar jastarmen jıi kezdesip, olarǵa aqyl-ósıetterimen bólisip, eldegi birlik pen turaqtylyqtyń qadiri týraly kóbirek nasıhat júrgizýi tıis. Ol kezdesýlerde jastardyń barynsha aýqymdy bóligin qamtýǵa kúsh salý kerek.

Biz «Rýhanı jańǵyrý» baǵdarlamasyn bos uran retinde ǵana emes, jastar tárbıesinde de utymdy paıdalaný qajetpiz. Sonymen qatar, ata-analardyń óz balalaryna degen jaýapkershiligin arttyrý baǵytyndaǵy jumystarǵa nazar aýdarǵan abzal», - dedi M.Sarybekov.

Oblystyq máslıhat depýtaty Erbolat Saýryqov, Taraz qalalyq máslıhatynyń hatshysy Batyrbek Kúlekeev, Qazaqstan Respýblıkasyna Eńbek sińirgen jattyqtyrýshy Sattar Beısembaev ta óz sózinde aǵa býyn men jastar arasynda ózara baılanysqa, bılik pen halyq arasyndaǵy nátıjeli dıalogty jandandyrýdyń mańyzdylyǵyna toqtaldy.

Olımpıada júldegeri, belgili sportshy Aqjúrek Tańatarov jastardy kóbirek sportqa tartyp, baýlý qajet dep sanaıdy.




«Sportqa berilgen jastar otanshyl, patrıot bolyp keledi. Olar Memleket jasap otyrǵan múmkindikterdi paıdalana otyryp, ózin damytyp, baıraqty básekelerde elimizdiń atyn tanytyp, kók Týymyzdy bıikten jelbiretýdi kózdeıdi. Mundaı maqsaty aıqyn jastar bireýdiń aıtaǵyna, arandatýyna erimeıdi, úlkenderge qurmetpen qaraıdy», - dedi A. Tańatarov.

Al oblystyq «Jas Otan» jastar qanatynyń tóraǵasy Ýálıhan Bolatbek mektepte, kolledjderdegi tárbıe sektoryna jaýap beretin orynbasar, psıologtardyń múmkindikteri men áleýetine taldaý jasap, reformalaý jaıyn qarastyrý qajettigin aıtty.

Jıyndy qorytyndylaǵan oblys ákimi barlyq usynys-pikirler eskerýsiz qalmaıtynyn, olar boıynsha jumystar júrgiziletinin atap ótti.

«Bizge qoǵamdaǵy turaqtylyq pen kelisim bárinen mańyzdy. Berekemizdiń negizi sanalatyn birligimizdi saqtaýymyz kerek»,-dedi túıindedi B. Saparbaev.








Joǵary qaraı