Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Jambyl oblysynyń Jýaly aýdanyna jańa ákim taǵaıyndaldy

2021 jyldyń 2 naýryz 2021 21:18

TARAZ. QazAqparat – Jambyl oblysy ákiminiń ókimimen Qazaqstan Respýblıkasy Prezıdenti Ákimshiliginiń jáne aýdandyq máslıhat depýtattarynyń kelisimimen Oljas Qarjaýov Jýaly aýdanynyń ákimi bolyp taǵaıyndaldy, dep habarlaıdy QazAqparat tilshisi.

Oblys ákimi Berdibek Saparbaev jańa basshyny aýdan aktıvine tanystyrdy.

Aımaq basshysy aýdannyń jańa ákimine aýdannyń áleýmettik-ekonomıkalyq damýy, zańdylyq pen tártipti nyǵaıtý boıynsha birqatar mindetter júktedi.

«Nabaı Ergebekov Jýaly aýdanynyń damýy jolynda kóp ter tókti desek, oǵan sol úshin alǵys aıtqym keledi. Oljas Qarjaýov – jas basshy. Sizder ony qoldap, aýdan ıgiligi úshin birlese jumys jasaıtyndaryńyzǵa men senemin»,- dedi Berdibek Saparbaev.





Óz kezeginde Narbaı Ergebekov aýdannyń damýy jolynda aıanbaǵanyn jetkizip, Oljas Qarjaýovqa sáttilik tiledi. Al, aýdannyń jańa ákimi bul taǵaıyndaýdyń ózine úlken jaýapkershilik júkteıtinin tilge tıek etip, qoldaý kórsetkeni máslıhat depýtattaryna rahmetin bildirip, belsendilerdi birge jumys isteýge shaqyrdy.

Jýaly aýdany aýyl sharýashylyǵy baǵytynda úlken áleýetke ıe. Osyny eskergen oblys ákimi kókónis sharýashylyǵy men mal sharýashylyǵyn shalqytýǵa, sý qoryn qalyptastyrýǵa, sý únemdeý tehnologııalaryn engizýge, kókónisterdi saqtaý qoımalarynyń sanyn arttyrýǵa erekshe nazar aýdartty. Sondaı-aq, aýdanda týrızmdi, atap aıtqanda jol boıyndaǵy servısti damytýǵa serpin berý tapsyryldy. Aımaq basshysy Oljas Qarjaýovqa turǵyndardyń suraqtary men shaǵymdaryna ýaqytyly jaýap berýdi, al aýyldyq okrýg ákimderine aýdan mektepteriniń túlekterimen belsendi túrde jumys júrgizýdi júktedi.

Oljas Esalhanuly 1983 jyly týǵan. Ol Almaty ekonomıkalyq ýnıversıtetin «qarjy jáne nesıe», M.H.Dýlatı atyndaǵy Taraz memlekettik ýnıversıtetin «quqyqtaný» mamandyqtary boıynsha bitirgen.

Eńbek jolyn 2003 jyly jeke sektordan bastaǵan.

2005-2014 jyldary jaýapkershiligi shekteýli seriktestikterinde basqarýshy laýazymdarda, 2014 jylǵy shilde-jeltoqsan aralyǵy Qazaqstannyń ulttyq kásipkerler palatasynyń óńirlik damý departamentiniń eksperti, dırektor orynbasary, 2015-2017 jyldary Almaty qalasynyń Kásipkerler palatasy dırektorynyń orynbasary, Mańǵystaý oblysy Kásipkerler palatasynyń dırektory, 2017-2018 jyldary «Atameken» Qazaqstan Respýblıkasy Ulttyq kásipkerler palatasynyń departament dırektory-basqarýshy dırektory, Basqarma tóraǵasynyń orynbasary, 2018-2020 jyldary Túrkistan, Jambyl oblystary Kásipkerler palatalarynyń dırektory qyzmetterin atqarǵan.

2020 jylǵy mamyrdan bastap búgingi kúnge deıin «Taraz» áleýmettik-kásipkerlik korporatsııasy» aktsıonerlik qoǵamynyń Basqarma tóraǵasy laýazymynda jumys jasap keldi.


Avtor Saıa Sembaı
Basty sózder: Jambyl oblysy, Taǵaıyndaý, Ákim,
Joǵary qaraı