Aýa raıy
Astana 19 °S
Almaty 30 °S
valıýta baǵamy
USD 412.55
EUR 468.66
RUB 5.79
CNY 58.80

Jambylda áleýmettik mańyzdy 12 azyq-túlik túriniń baǵasy ósken

2020 jyldyń 2 shilde 2020 07:18

TARAZ. QazAqparat – Jambyl oblysynda jyl basynan beri áleýmettik mańyzy bar 12 azyq-túlik taýarynyń baǵasy ósken. Bul jóninde oblys ákiminiń orynbasary Berik Nyǵmashevtyń tóraǵalyǵymen ótken shtab otyrysynda aıtyldy, dep habarlaıdy QazAqparat tilshisi.

Jıynda Berik Nyǵmashev Jambyl oblysy pııazdy úlken kólemde óndiretin aımaq bola tura pııaz baǵasy jyl basynan beri 62 paıyzǵa óskenin jáne baǵany turaqtandyrý maqsatyndaǵy jumystardyń óz deńgeıinde júrgizilmegenin atap ótti.

«Ózim aralap júrip Taraz qalasyndaǵy «Smart», «Dámdes» sııaqty iri saýda ortalyqtary men Abaı kóshesiniń boıynda jáne 13 móltekaýdanda ornalasqan áleýmettik dúńgirshekterdi aralap, áleýmettik mańyzy bar azyq-túlik taýarlarynyń baǵalaryn zerdeledim. Onyń barysynda turaqtandyrý qorynyń taýarlary saýda núktelerine tolyq kólemde jetkizilmeıtinine, apta saıynǵy monıtorıng jumystarynyń óz deńgeıinde júrgizilmeıtinine kóz jetkizip, tıisti tulǵalarǵa naqty tapsyrmalar júkteldi»,-dedi B.Nyǵmashev.

Osy oraıda aýyl sharýashylyǵy basqarmasy basshysynyń mindetin atqarýshy Jandos Jaqypov negizgi azyq-túlik taýarlary baǵasyn turaqtandyrý boıynsha atqarylyp jatqan jumystarǵa toqtaldy.

Kásipkerlik jáne ındýstrıaldy-ınnovatsııalyq damytý basqarmasy basshysynyń mindetin atqarýshy Danııar Jamanqulov, Taraz qalasy ákiminiń orynbasary Qaısar Sarytaı jáne Jambyl aýdany ákiminiń orynbasary Nurlan Nesipbekov azyq-túlik taýarlary baǵalaryn turaqtandyrý baǵytynda qabyldanǵan sharalar jóninde baıandama jasady.

Jıyn sońynda oblys ákiminiń orynbasary Berik Nyǵmashev tıisti sala basshylary men jaýapty mamandarǵa Túrkistan oblysynda erte pisken kókónis ónimderin jetkizip saýda núktelerine satylymǵa shyǵarý úshin ár aýdannan kem degende 5 iri saýda oryndaryn anyqtaýdy júktedi.

Sondaı-aq, ár aýdanda aýdan ákimi orynbasarlarynyń tóraǵalyǵymen azyq-túlik baǵalaryna monıtorıng júrgizetin arnaıy top qurýdy, áleýmettik dúkender men saýda qatarlarynyń sanyn ulǵaıtýdy jáne saqtaýda turǵan qory jetkilikti taýarlardy, ásirese nan, un, qant, kúnbaǵys maı, qaraqumyq jarmasyn turaqty túrde negizgi saýda oryndaryna ótkerý men jetkizip berý jumystaryn kúsheıtýdi tapsyrdy.

Aıta keteıin ótken jyly azyq-túlik baǵalaryn turaqtandyrý maqsatynda Taraz qalasyndaǵy sýpermarketter men áleýmettik dúńgirshekterde arnaıy turaqtandyrý qorynyń saýda sóreleri ashylyp, onda áleýmettik mańyzy bar taýarlardiń tómen baǵada satylýy qolǵa alynǵan bolatyn.




Jalpy jyl basynan beri óńirde turaqtandyrý qory arqyly 640,5 tonna azyq-túlik taýary men 228 myń dana jumyrtqa ótkerilgen.





Joǵary qaraı