Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Jambylda byltyr sybaılas jemqorlyq boıynsha 110 qylmystyq is sotqa joldanǵan

2021 jyldyń 22 qańtar 2021 07:25

TARAZ. QazAqparat – Jambyl oblysynda ótken jyly sybaılas jemqorlyq boıynsha 110 qylmystyq is sotqa joldanyp, 70-ten asa tulǵa jaýapkershilikke tartylǵan, dep habarlaıdy QazAqparat tilshisi.

QR Sybaılas jemqorlyqqa qarsy is-qımyl agenttigi Jambyl oblys boıynsha departamentiniń basshysy Ádilhan Áshirbaev «ANTIKOR» servıstik ortalyǵynda jyl qorytyndysyna arnalǵan brıfıng ótkizdi. Esepti jıynda Ádilhan Hasymhanuly osy tańǵa deıin atqarylǵan jumystardy baıan etip, jýrnalısterdiń suraqtaryna jaýap berdi.

«Ótken jyly oblys boıynsha Sybaılas jemqorlyqqa qarsy qyzmeti tarapynan 110 qylmys anyqtaldy. Burnaǵy jyldyń esepti kezeńimen salystyrǵanda bul jemqorlyq faktileriniń 12,7 paıyzǵa tómendegenin kórsetip otyr. Naqtyraq aıtsaq, sybaılas jemqorlyq qylmystary 19,4, aýyr sanattaǵy qylmystar 3,9 paıyzǵa azaıǵan. Esepti kezeńde departament mamandary jemqorlyq derek­teriniń júıeli túri boıynsha – 7, memlekettik baǵdarlamalar aıasynda bólingen qarajattardy urlaý – 14, bıznes sýbektileriniń jumysyna zańsyz aralasýdyń 9 deregin anyqtap, 77 kásipkerdiń quqyǵyn qorǵady. Oblys deńgeıindegi 7 basshyǵa jáne qala men aýdan sheńberindegi 7 basshyǵa qatysty qylmystyq isti tirkedi»,-dedi departament basshysy.

Tirkelgen qylmystyq ister boıynsha 771 mıllıon teńge kólemindegi zalal anyqtalyp, onyń 654 mıllıon teńgesi óndirildi. Qylmystardy tergeý barysynda 153 mıllıon teńgeniń múlkine shekteý qoıylǵan.
Sondaı-aq, byltyr sotqa joldanǵan 110 is boıynsha 72 adam qylmystyq jaýapkershilikke tartylǵan. Bul 2019 jylǵa qaraǵanda kórsetkishterdiń tómendegenin kórsetedi.

Budan bólek byltyr qylmystyq quqyqbuzýshylyqtar jáne basqa da zańbuzýshylyqtar jasaýǵa yqpal etken mán-jaılardy joıý boıynsha 97 usynys joldanyp, onyń 87-si qaralyp, nátıjesinde 78 laýazymdy tulǵa ártúrli deńgeıdegi tártiptik jaza arqalaǵan.

Óz kezeginde sóz alǵan departament basshysynyń birinshi orynbasary Ravıl Tólebaev profılaktıkalyq baǵytta júrgizilip jatqan ózge de sharalar týraly baıan etti.

«Ótken jyly 17 sybaılas jemqorlyqqa qarsy monıtorıng júrgizilip, onyń qorytyndysymen 28 sybaılas jemqorlyq táýekeli anyqtaldy. Monıtorıng nátıjesimen 11 normatıvtik quqyqtyq aktige ózgerister men tolyqtyrýlar engizilip, uıymdastyrýshylyq-basqarýshylyq sharalary qabyldandy. Onyń ishinde Taraz qalasynda turǵyn úı qorynan turǵynjaıdy muqtaj azamattarǵa berý boıynsha zańsyz qabyldanǵan qaýlynyń kúshi joıylyp, byltyr páterler men jataqhanalardyń 2006-2007 jyldardan beri kezeginde turǵan muqtaj azamattarǵa berildi»,-dedi R.Tólebaev.

Sonymen qatar, departament basshysynyń orynbasary «Jambyl – adaldyq alańy» jobalyq ofısimen birlese jasaǵan jumystardy da tilge tıek etti.


Joǵary qaraı