Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Jambyldaǵy jarylys: Berdibek Saparbaev Prezıdentke tótenshe jaǵdaı saldaryn joıý jóninde esep berdi

2021 jyldyń 9 qyrkúıek 2021 16:00

NUR-SULTAN. QazAqparat - Prezıdent Jambyl oblysynyń ákimi Berdibek Saparbaevtyń esebin tyńdady, dep habarlaıdy QazAqparat.

Memleket basshysy baspasóz qyzmetiniń jetekshisi Berik Ýálı taratqan málimetke sensek, Qasym-Jomart Toqaev Jambyl oblysynyń ákimi Berdibek Saparbaevtyń Baızaq aýdanynda bolǵan tótenshe jaǵdaıdyń saldaryn joıý jónindegi esebin telefon arqyly tyńdaǵan.

Prezıdentke 122 jyljymaıtyn múliktiń, sonyń ishinde 106 turǵyn úı, 12 kommertsııalyq jáne 4 áleýmettik nysannyń qıraǵany jóninde baıandaldy.

Qazirgi ýaqytta 12 mekeme, 23 tehnıka men 185 jumysshy qaıta qalpyna keltirý jumystaryna jumyldyrylǵan.

Jambyl oblysy ákiminiń aıtýynsha, búginge deıin 62 turǵyn úı jóndelgen. Jalpy qaıta qalpyna keltirý jumystaryn 10 qarashaǵa deıin aıaqtaý josparlanyp otyr. Jibek joly aýylyndaǵy qıraǵan №5 orta mekteptiń ornyna jańa mektep salynady.

Berdibek Saparbaevtyń málimeti boıynsha 26 adam statsıonarda em alyp jatyr. Olardyń 15-i gospıtalda emdelip jatqan áskerı, polıtsııa jáne Tótenshe jaǵdaılar jónindegi departamenttiń qyzmetkeri.

Jarylystan qaza bolǵandardyń otbasylaryna materıaldyq kómek kórsetilýde, sondaı-aq zardap shekken otbasylardyń jumyssyz múshelerin jumysqa ornalastyrý máselesi sheshilip jatyr. Ekinshi deńgeıli bankterge qaryzy bar mundaı otbasylardyń kredıtterin óteý máselesi tolyq sheshilgen.

Sonymen qatar Memleket basshysyna óńirdiń áleýmettik-ekonomıkalyq damýy jóninde málimet berildi. Jambyl oblysynyń ekonomıkalyq ósimi 106,4 paıyzdy quraıdy. Bıylǵy qańtar-tamyz aılarynyń qorytyndysy boıynsha ónerkásip óndirisiniń ósimi 5,4%, aýyl sharýashylyǵy 3%, ınvestıtsııa 19,5 %, qurylys 9%, turǵyn úı 14%, saýda-sattyq 4% deńgeıinde bolady dep kútilýde.

Bıyl aýa raıynyń qolaısyzdyǵy men qýańshylyqqa qaramastan, egin ónimdiligi oblys boıynsha gektaryna 15 tsentnerden aınalmaq.

Ákimniń aıtýynsha, oblystaǵy vaktsına alýǵa tıisti turǵyndardyń 72,5 paıyzy ekpe alǵan.

Sonymen qatar Prezıdentke vaktsına shyǵaratyn zaýyttyń daıyn ónimdi quıýǵa tolyq ázir ekeni aıtyldy. Jumys kestege saı júrgizilýde.

Zaýyt pen Bıologııalyq qaýipsizdik problemalary jónindegi ǵylymı zertteý ınstıtýtynyń qyzmetkerlerine arnalǵan úıler men akt zaly bar dene shynyqtyrý-saýyqtyrý kesheniniń qurylysy jalǵasyp jatyr.

Áńgime sońynda Qasym-Jomart Toqaev oblys ákimine osy baǵyttaǵy jumystardy jalǵastyrý jóninde birqatar naqty tapsyrma berdi.


Joǵary qaraı