Jambyldyq polıtsııanyń jeke quramy kúsheıtilgen rejımge kóshti
TARAZ. QazAqparat – Jambyl oblysynda polıtsııanyń jeke quramy kúsheıtilgen jumys rejımine kóshirildi,- dep habarlaıdy QazAqparat tilshisi.
Jambyl oblysynda «Quqyqtyq tártip» respýblıkalyq jedel-aldyn alý sharasyn ótkizýge polıtsııa qyzmeti bólinisteriniń qyzmetkerleri men Ulttyq ulannyń áskerı qyzmetshileri birlesip jumyldyryldy.
«Osy kezeńde jeke quram tıisti qoǵamdyq tártipti saqtaý, kóshelerde jáne basqa da qoǵamdyq oryndarda quqyq buzýshylyqtardyń aldyn alý jáne jolyn kesý maqsatynda kúsheıtilgen jumys rejımine kóshirildi. Pysyqtaý sheńberinde qala aýmaǵynda polıtsııa jasaqtarynyń shyǵý jıiligi artty. Quqyq buzýshylyqtarǵa «nóldik tózbeýshilik» aıasynda polıtsııa qyzmetkerleri men áskerı qyzmetshiler kóshelerdi, aýlalardy, skverlerdi, saıajaı massıvterin jáne basqa da qoǵamdyq oryndardy aralaıdy. Sondaı-aq kóshi-qon zańnamasyn, onyń ishinde qurylys jáne saýda salalarynda buzýshylyqtardy anyqtaý boıynsha tekserýler júrgizilýde. Sonymen qatar, azamattyq qarý ıeleri men polıtsııanyń profılaktıkalyq esebinde turǵan adamdarǵa tekserý júrgizilýde», – dedi Polıtsııa departamentiniń Jergilikti polıtsııa qyzmeti basqarmasy bastyǵynyń orynbasary Jaıdar Quttybaev.
Sondaı-aq, habar-osharsyz ketken adamdardy, qylmyskerlerdi izdestirý, bótenniń múlkin urlaýmen, páter urlaýmen, basqa da urlyq túrlerimen aınalysatyn qylmystyq toptardy áshkereleý boıynsha PD jedel bólimsheleriniń jumysy jandandyrylǵan.
Aıta keteıik, «Quqyqtyq tártip» jedel-aldyn alý is-sharasy krımınogendik jaǵdaıdy saýyqtyrýǵa, sondaı-aq qylmystar men quqyq buzýshylyqtardyń aldyn alýǵa, jolyn kesýge baǵyttalǵan.
