Jańa Almaty turǵyndarynyń máselelerimen arnaıy komıssııa aınalysady
ALMATY. QazAqparat - Almaty ákimi Baqytjan Saǵyntaev Alataý aýdanynyń Alǵabas yqshamaýdanynyń turǵyndaryn tyńdady, dep habarlaıdy QazAqparat tilshisi.
Qala ákimi B. Saǵyntaev Instagram akkaýntynda Alataý aýdanynyń problemaly aımaqtarymen tanysyp, jumys komıssııasyn qurýǵa sheshim qabyldaǵanyn aıtty.
«Eń áýeli Alǵabas yqshamaýdanyndaǵy №185 mekteptiń janyndaǵy Aldııar kóshesiniń sý basý máselesin sheshý qajet. TJD kómegimen shuǵyl sharalar qabyldanady», - dep jazdy B. Saǵyntaev. Injenerlik jeliler júrgizilgenge deıin joldar ınertti materıaldarmen jabylady.
Alǵabasqa 13,5 km sý qubyry men 17 km káriz jelisi júrgizilýde. Qosymsha 1011 úıdi qamtıtyn jelini júrgizý josparlanýda. Osylaısha búkil yqshamaýdan sýmen jabdyqtaý jáne sý burý júıesimen qamtamasyz etilmek.
Sondaı-aq, Almaty ákimi Áıgerim-1 yqshamaýdanyndaǵy Naberejnaıa kóshesine aryq júıesin salý máselesin sheshýdi tapsyrdy. Bul atalǵan ýchaskeni sý basý qaýpin joıady.
Qala ákimi turǵyndar aıtqan barlyq másele, ıaǵnı ıesiz jeliler, kóshege jaryq ornatý, qoǵamdyq qaýipsizdikti qamtamasyz etý syndy jumystardy jeke baqylaýyna aldy. Atqarylǵan jumys týraly habarlap otyratyn jumys komıssııasy quryldy. Júrgizilip jatqan jumystardyń sapasyn tekserý úshin yqshamaýdandardyń belsendi ókilderinen qurylǵan qoǵamdyq baqylaý bastamasy qoldaý tapty. Baqytjan Saǵyntaev aýdan ákimderine olarmen turaqty baılanysta bolýdy tapsyrdy.
Ákim Shańyraq-2 jáne «14 aýmaq» yqshamaýdandaryndaǵy sorǵysh stansanyń, sondaı-aq AZTM Alǵabas yqshamaýdanyndaǵy salynǵan jelilerdiń jaǵdaıymen tanysty. Jelilerdiń qurylysy aıaqtalǵan soń turǵyndardy olarǵa qosý boıynsha sharalar qabyldanady.
