Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Jangeldın aýdany Ahmet Baıtursynuly aýdany bolyp ózgere me

2022 jyldyń 24 qańtar 2022 17:45

NUR-SULTAN. QazAqparat – Qostanaı oblysynyń Jangeldın aýdany Ahmet Baıtursynuly aýdany bolyp ózgere me? Májilis depýtattarynyń bul saýalyna QR Premer-Mınıstriniń orynbasary Eraly Toǵjanov jaýap berdi, dep habarlaıdy QazAqparat tilshisi.

«Ahmet Baıtursynulynyń 150 jyldyq mereıtoıy jóninde kelesi jumystar atqarylýda. Qazaqstan Respýblıkasy Prezıdentiniń 2021 jylǵy 19 maýsymdaǵy №624 Jarlyǵyna sáıkes Ahmet Baıtursynulynyń 150 jyldyq mereıtoıyn daıyndaý jáne ótkizý jónindegi memlekettik komıssııa qurylyp, Qazaqstan Respýblıkasynyń Memlekettik hatshysy atalǵan komıssııa tóraǵasy bolyp belgilendi. 2021 jylǵy 27 qazanda Qazaqstan Respýblıkasynyń Memlekettik hatshysy tóraǵalyǵymen ótken Memlekettik komıssııa otyrysynda Ahmet Baıtursynulynyń 150 jyldyq mereıtoıyn daıyndaý jáne ótkizý jónindegi jalpyrespýblıkalyq jospar bekitildi. Josparda Ahmet Baıtursynulynyń shyǵarmashylyq muralaryn halyqaralyq, respýblıkalyq jáne óńirlik deńgeıde nasıhattaý maqsatynda ǵylymı, mádenı-aǵartýshylyq, aqparattyq-ımıdjdik is-sharalar qamtylǵan. Atalǵan josparda depýtattyq saýalda kóterilgen birqatar máseleler qarastyrylǵan», - dedi Eraly Toǵjanov jaýabynda.

Vıtse-premerdiń atap ótýinshe, Qostanaı oblysy Jangeldi aýdanynyń Ahmet Baıtursynuly aýylyndaǵy tulǵa ómirge kelgen úıdi qalpyna keltirip, jádigerlermen tolyqtyryp, mýzeı-úı etip ashý jáne Baıtursyn áýletiniń qorymyn qorshaýyn jańartý, Qostanaı oblysynyń aýmaǵynda Ahmet Baıtursynulynyń memorıaldyq keshenin salý, Ahmet Baıtursynuly aýylyna baratyn joldy kúrdeli jóndeýden ótkizý, Qostanaı oblysyndaǵy «Ahmet Baıtursynuly men Mirjaqyp Dýlatulynyń ádebı murajaıyn», Almaty qalasyndaǵy «Ahmet Baıtursynuly mýzeı-úıin» abattandyrý jumystaryn júrgizý josparda kózdelgen.

«Sondaı-aq Qostanaı oblysyndaǵy Ahmet Baıtursynulynyń dúnıege kelgen Sarytúbek qonysy aımaqtyq mańyzy bar kıeli jerler tizimine engizilgenin habarlaımyz. Ahmet Baıtursynuly mýzeı-úıi Almaty qalasy máslıhatynyń 2021 jylǵy 31 mamyrdaǵy № 51 sheshimine sáıkes jeke menshikten kommýnaldyq menshikke alyndy. Atalǵan josparǵa sáıkes, osy jyly Ahmet Baıtursynulynyń mýzeı-úıiniń ǵylymı-restavratsııalyq jumystary úshin ǵylymı-jobalaý qujattamasy ázirlenetin bolady. Sizder usynyp otyrǵan Jangeldın aýdanynyń atyn ózgertý, Qostanaı qalasyndaǵy áýejaıǵa Ahmet Baıtursynulynyń atyn berý máselesi qoǵamnyń pikirin eskerý maqsatynda jergilikti halyqpen, aýyldyq okrýgpen, qoǵamdyq keńes múshelerimen, máslıhat depýtattarymen, ardagerler keńesimen talqylaý jumysy, kezdesýler uıymdastyrylǵannan keıin nátıjesine qaraı qoldanystaǵy zańnama talaptaryna sáıkes iske asyrylatyn bolady», - dedi ol.

Úkimet basshysynyń orynbasary Ahmet Baıtursynulynyń esimin oblys ortalyqtaryndaǵy mektepterge, ortalyq kóshelerge (dańǵyldarǵa) berý máselesi jergilikti jerlerdiń onomastıkalyq komıssııa otyrystarynda qaralatyndyǵyn aıtady.

«Bul maqsattaǵy jumystar zańnamada belgilengen tártipke sáıkes barlyq óńirlerdiń ákimdikteri tarapynan iske asyrylady. Sonymen qatar Ahmet Baıtursynulynyń eskertkishin ornatý máselesi de Nur-Sultan, Almaty, Shymkent qalalarynda jáne oblys ortalyqtarynda qoldanystaǵy zańnama talaptaryna sáıkes júzege asyrylady. Al Túrkııanyń Ankara qalasynda, Reseıdiń Orynbor qalasynda Ahmet Baıtursynulynyń eskertkishin ornatý máselesin qarastyrý atalǵan josparda qamtylǵan. Josparda Ahmet Baıtursynulynyń muralaryn túrki álemine nasıhattaý maqsatynda TÚRKSOI uıymynyń, otandyq jáne sheteldik zııaly qaýym ókilderiniń qatysýymen Ystambul qalasynda dóńgelek ústel, fotokórme uıymdastyrý, Túrkistan qalasynda Halyqaralyq túrkitanýshylar kongresin ótkizý, sonymen qatar Halyqaralyq Túrki akademııasynyń uıymdastyrýymen Baký qalasynda «Baký kongresi jáne Ahmet Baıtursynuly» atty konferentsııa, Orynbor jáne Tashkent qalalarynda mereıtoıǵa arnalǵan is-sharalardy ótkizý qarastyrylǵan», - dedi Eraly Toǵjanov.


Joǵary qaraı