Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Jáńgirdi bıiktetý úshin Mahambet pen Isataıdy alasartqan joqpyz – Arman Sqabyluly

2021 jyldyń 2 jeltoqsan 2021 20:56

NUR-SULTAN. QazAqparat – Belgili prodıýser, «Jáńgir han. Saraı syry» tarıhı serıalynyń kórkemdik jetekshisi Arman Sqabyluly týyndyda Mahambet pen Isataıdyń obrazy qalaı beınelegenin aıtyp berdi, dep habarlaıdy QazAqparat tilshisi.

Qazaqstan arnasy túsirgen 6 tarıhı serıaldyń ishinde «Jáńgir han. Saraı syry» atty hıkaıa da bar.

Kórermenge ulttyq arna efırinen jol tartatyn týyndynyń kórkemdik jetekshisi Arman Sqabylulynan Jáńgir hannyń qaıshylyqty obrazy kıno tilinde qalaı somdalǵany týraly suraǵan edik.

«Jáńgir han. Saraı syry» serıalynyń stsenarıin jazǵan úsh adamnyń biri retinde, týyndynyń kórkemdik jetekshisi retinde bul saýalyńyzǵa bylaı jaýap bere alamyn. Bir ǵana nárseni aıtaıyn. Mahambet te, Isataı da - bizdiń iri tulǵalarymyz. Biri – batyrymyz, biri – aqynymyz. Olardyń qasynda sovet ıdeologııasynyń dáýreni júrip turǵan kezde Jáńgir han óte bir jaýyz obrazda kórsetilgenin bilemiz. Al tarıhqa úńilseńizder, zertteý eńbekterine súıenseńizder, Jáńgir múldem ondaı adam bolmaǵan. Serıalda Jáńgir de bıik, Mahambet te bıik, Isataı da bıik», - deıdi tanymal jýrnalıst.

Prodıýserdiń aıtýynsha, serıalda Jáńgir men Isataı arasyndaǵy arazdyq jer máselesinen týyndaǵany baıandalady.

«Jáńgir men Mahambet bala kezden birge ósken. Oqýǵa da birge barǵan. Sońynda Mahambet saraıdan ketip qalady. Sodan 2-3 jyldan keıin tarıhqa belgili kóterilis burq etedi. Osylaısha bala kúngi dostar bir-birine ata jaý bolyp shyǵa keledi. Tarıhtyń osylaı órbýine ne sebep boldy? Keıbir tarıhshylar jerge baılanysty degendi alǵa tartady. Jer máselesi boıynsha qaıshylyq Isataı men Jáńgir arasynda bolǵan», - dedi Arman Sqabyluly.

Sondaı-aq, ol Jáńgir han men ult-azattyq kóterilis basshylarynyń arasnydaǵy qaıshylyq áıelge talastan bolǵan deıtin derekti joqqa shyǵardy.

«Bul serıal bolǵannan keıin, kórkem týyndy bolǵannan keıin, Mahambetti de, Jáńgirdi de, Isataıdy da tómendetpeı, tarıhı kezeńdegi qaıshylyqtyń neden týyndaǵanyn kórsetýge tyrystyq. Ony kórermen túsinedi dep oılaımyn. Odan keıin ol jerde jurt oılaǵandaı áıel máselesi joq», - dedi týyndynyń kórkemdik jetekshisi.

Aıtýynsha, serıaldyń shıkizatyn daıyndaǵan kezde Mahambet týraly zertteýlerden bólek, Rahymjan Otarbaevtyń Jáńgir han týraly materıaldary qoldanylǵan.

«Akademık Zeınolla Qabdolovtyń ózi qaıtys bolǵannan keıin jaryq kórgen «Mahambet» romany bar. Odan basqa Batys óńirinen shyqqan tarıhshylarymyzdyń báriniń eńbegin qaradyq. Tipti kózi tirilerimen kezdesip, aqyldasyp otyrdyq. 2012 jyly óz basym «Habar» arnasyna sol kezde Reseıdegi Elshi bolǵan Zaýytbek Turysbekovtiń ótinishimen «Bókeı han» jaıynda derekti fılm daıyndaǵanmyn. Osy jumys aıasynda Orynbordyń, Qazannyń arhıvterin aqtarýdyń sáti túsken. Negizgi ıdeıa sol kezde kelgen. Arhıv materıaldaryn kórgen kezde «Shirkin-aı, mundaǵy oqıǵalar Osmanlynyń «Súleımen sultanynyń» saraıy sııaqty eken ǵoı» dep tańdanǵanbyz. Jáńgirdiń áıelderi birinen keıin biri qaıtys bolady, balasy kóz jumady. Saraıǵa tatar sulýy Fátıma túskennen keıin «ıntrıgalar» bastalady. Munyń bári serıalǵa daıyn turǵan stsenarıı sııaqty kórindi. Endi sony ekranǵa ıkemdep berýge tyrystyq», - dedi belgili prodıýser.


Joǵary qaraı