Aýa raıy
Astana -26 °S
Almaty -1 °S
valıýta baǵamy
USD 421.58
EUR 496.83
RUB 5.53
CNY 62.20

Jas ónertapqyshtar erekshe qajettiligi bar adamǵa arnalǵan qurylǵy jasady

2020 jyldyń 27 qazan 2020 16:13

NUR-SULTAN. QazAqparat - Nursultan Nazarbaev qory «KazRoboProject» baıqaýynyń jas ónertapqyshtary protsesterdi avtomattandyrý, erekshe qajettilikteri bar adamdardyń ómirin jeńildetý, bos ýaqytty uıymdastyrýǵa arnalǵan kreatıvti ıdeıalaryn usyndy, dep habarlaıdy QazAqparat.

Jyl boıy jobanyń 10 jastan 21 jasqa deıingi qatysýshylary arasynan úzdikterdi irikteý júrgizildi. Baıqaý «KazRobotıks» federatsııasynyń damý baǵdarlamasynyń bir bóligi jáne jastardyń shyǵarmashylyq qabiletterin damytýǵa, ǵylymı-tehnıkalyq baǵyttaǵy qoldanbaly zertteýlerge qyzyǵýshylyǵyn arttyrýǵa baǵyttalǵan.

- Jastar jobasyn naqty jaǵdaılarda múmkin bolatyn praktıkalyq qoldanýǵa maqsatty túrde daıyndaý sharalary jas ónertapqyshtardy ratsıonalızatorlyq qyzmettiń negizderin túsinýge jeteleıdi, olardyń ári qaraı kásibı ósýine negiz qalaıdy, - deıdi «KazRobotıks» federatsııasynyń prezıdenti Aıjan Jekeeva.

Balalar jasaǵan jobalar – bul belgili bir máseleni sheshý úshin aıtarlyqtaı paıda ákeletin tehnıkalyq qurylǵyny (robotty qurylǵy, mıkroprotsessorlyq júıe) qurýǵa baǵyttalǵan qoldanbaly jumystar.

Baıqaý eki jas tobynda ótti: 10-15 jas jáne 16-21 jas, sondaı-aq ár jas tobynda eki nomınatsııa boıynsha: «Kontsept» jáne «Prototıp» jeńimpazdar anyqtaldy.

Baıqaýǵa elimizdiń ár túkpirinen barlyǵy 62 joba usynyldy. Jumystardy Qazaqstan mashına jasaýshylar odaǵynyń ókilderi, óndiris ınjenerleri, ótken jyldardyń júldegerleri jáne t. b. baǵalady.

Baıqaý jeńimpazdary:

- 10-15 jas aralyǵyndaǵy topta «Kontsept» nomınatsııasy boıynsha – «Twinkle» (Kókshetaý qalasy) komandasynyń músheleri Dáýrenbek Sáken jáne Bolat Aıdamır . Balalar zamanaýı «IT-oıyn-saýyq parki» tujyrymdamasyn ázirledi.

Ekinshi jeńimpaz – quramynda Andreı Dorohın men Aıpara Syzdyqova bar «Grad» komandasy (Pavlodar qalasy). Olar «Firebot» dep atalatyn adamnyń qatysýynsyz órt sóndirý mashınasyn jasaý jobasyn usyndy;

- 16-21 jas aralyǵyndaǵy topta «Kontsept» nomınatsııasy boıynsha – Farabı Samalıkov pen Muhtar Orazbaı (Atyraý qalasy, «FM Team» komandasy). Olar erekshe qajettilikteri bar adamdardyń aıaq-qolyn ońaltýǵa arnalǵan belsendi-passıvti trenajerdy oılap tapty;

– 10-15 jas aralyǵyndaǵy topta «Prototıp» nomınatsııasynda – Ádilet Shalqaruly jáne Darııa Seksenbaeva (Taldyqorǵan q., «Future-IT»). Baıqaýǵa qatysýshylar «erekshe qajettilikteri bar adamdarǵa arnalǵan bilezik» jasady. Bilezik adamdarǵa qajetti avtobýs baǵytyn, avtobýs jelisin tabýǵa, qandaı da bir kederginiń qanshalyqty jaqyn ekenin anyqtaýǵa kómektesetin eholokator retinde ázirlengen;

- 16-21 jas aralyǵyndaǵy topta «Prototıp» nomınatsııasy boıynsha – Danııl Belov pen Anastasııa Voronkova («Robotrek-Aqtaý»). Olar «Braıl shrıftin óz betinshe oqyp úırený» jobasynyń avtorlary. Qurylǵy nashar kóretin jáne zaǵıp adamdarǵa jazýdy jáne oqýdy úırenýge kómektesedi. Qurylǵy batyrmasyn basý arqyly adam árip dybysyn estip qana qoımaı, saýsaqtyń kómegimen onyń qalaı belgilenetinin sezinýge bolady.

Baıqaý jeńimpazy atanǵan bul jobalardan bólek, fınalǵa shyqqan jobalar da ónertapqyshtyǵymen erekshelendi. Mysaly Matveı Rybalkın men Danııl Edgýlovtyń (Almaty qalasy) «City helper» qurylǵysy. Ol kózi nashar kóretin adamdarǵa qajetti aıaldamany tabýǵa, avtobýs tańdaýǵa kómektesetin kommýtator saǵat.

Taǵy bir qyzyqty joba – fınalıst Arlan Muhamedjanov pen Vladıslav Prosekovtyń (Petropavl qalasy) «Aeroponıka» jobasy. Olar ósimdikterdi sýdy únemdi paıdalaný arqyly sýǵarýǵa, robototehnıka arqyly egin jınaýǵa jáne barlyq protsesterdi qashyqtan baqylaýǵa múmkindik beretin júıeni oılap tapty.


Basty sózder: Bilim, Ǵylym, Áleýmettik qoldaý,
Joǵary qaraı