Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Jastarǵa arnalǵan jańa múmkindikter Qaraǵandyda ótken forýmda talqylandy

2021 jyldyń 27 qazan 2021 15:52

QARAǴANDY. QazAqparat - Qaraǵandynyń Dostyq úıinde «Tórtinshi onjyldyqtaǵy Táýelsiz Qazaqstan» taqyrybynda óńirlik jastar forýmy ótti, dep habarlaıdy QazAqparat.

Qaraǵandylyqtar óz jetistikteriniń tarıhymen bólisti jáne jastar bastamalaryna memleket tarapynan kórsetiletin qoldaý sharalary men ózin-ózi júzege asyrýdyń jańa múmkindikterin talqylady, sondaı-aq Táýelsizdiktiń 30 jylyndaǵy elimizdiń jetistikteri týraly sóz qozǵaldy.

Іs-sharaǵa JOO stýdentteri, eriktiler, kásipkerler, jumysshy jastar jáne táýelsizdiktiń qurdastary qatysty.

Forýmdy Qaraǵandy oblysynyń Jastar saıasaty máseleleri jónindegi basqarmasy uıymdastyrdy. Moderator basqarma basshysy Birjan Álimjanov boldy. Abaı aýdanynyń Qaraǵandy aýyldyq okrýginiń jas ákimi Vladıslav Kıreı, telejýrnalıst jáne Táýelsizdiktiń qurdasy Janbota Rahmetollauly, sondaı-aq «Bolashaq» prezıdenttik baǵdarlamasynyń túlegi, PhD doktory Laýra Joldasova arnaıy qonaq retinde shaqyryldy.




«Men 26 jastamyn. Qarapaıym otbasynda týyp óstim. Bala kezimnen barlyq qoǵamdyq is-sharalarǵa belsendi qatystym. Qaztutynýodaǵy Qaraǵandy ekonomıkalyq ýnıversıtetin «Memlekettik jáne jergilikti basqarý» mamandyǵy boıynsha bitirdim. Sodan keıin magıstratýrany támamdadym. Máskeýde taǵylymdamadan óttim. Abaı aýdanynyń Jastar resýrstyq ortalyǵynda jumys istedim, ony basqardym. Mine, bıyl Nur Otan partııasynan aýyl ákimderin saılaýǵa óz kandıdatýramdy usynýdy uıǵardym. Men ákim laýazymynda bar bolǵany úsh aı jumys isteımin. Qazir jastardyń damýy men mansaptyq ósýi úshin barlyq múmkindikter bar», – dedi Vladıslav Kıreı.




Forýmda Táýelsizdigimizdiń tórtinshi onjyldyǵyna qadam basarda Qazaqstannyń qol jetkizgen jetistikteri týraly aıtyldy. Bolashaqqa jospar quryldy. Sondaı-aq, spıkerler óz kásibin qalaı tapqanyn, mansap pen jeke damýda belgili bir bıikterge jetkenderin aıtty. Árkim óz mysalynda sáttilik eńbekqorlyq pen tabandylyqtyń arqasynda bolatynyn atap ótti.

«Men Ulybrıtanııanyń Brıstol ýnıversıtetiniń túlegimin. Ony bitirgennen keıin M. S. Nárikbaev atyndaǵy QazGZÝ Quqyq joǵary mektebinde dekannyń orynbasary bolyp jumys istedim. Qazir E. A. Bóketov atyndaǵy Qaraǵandy ýnıversıtetinde zań fakýltetiniń kafedrasyn basqaramyn. Óz tájirıbeme súıene otyryp, ómirde bir nársege qol jetkizý úshin kóp oqyp, eńbektený kerektigin senimdi túrde aıta alamyn», – dep atap ótti Laýra Joldasova.




Forým sońynda bıznes-ıdeıalar baıqaýynyń 10 jeńimpaz stýdenti marapattaldy. Eń úzdik jobalar qatarynda tisterdi aǵartý stýdııasy, shınalyq servıs, ınnovatsııalyq tehnologııalardy paıdalana otyryp, pıtstsa shyǵaratyn tseh, akkýmýlıatorlyq batareıalardy symsyz zarıadtaýǵa arnalǵan qurylǵylardy, plastıkalyq buıymdardy, aǵashtan ulttyq stıldegi turmystyq zattardy shyǵaratyn avtomattandyrylǵan shaǵyn tseh bar.





Joǵary qaraı