Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Jasyl Qazaqstan: Ulttyq joba qandaı mindetterdi sheshýge arnalǵan

2021 jyldyń 19 qazan 2021 08:52

NUR-SULTAN. QazAqparat – Jaqynda QR Prezıdenti Qasym-Jomart Toqaev Ulttyq jobalar tizbesin bekitý týraly Jarlyqqa qol qoıdy.

Osy 10 jobanyń arasynda «Jasyl Qazaqstan» ulttyq jobasy da bar. Ol halyqtyń qolaıly ómir súrý ortasyn qurýǵa jáne eldegi ekologııalyq jaǵdaıdy jaqsartýǵa baǵyttalǵan. Ulttyq joba 4 negizgi baǵytty qamtıdy.

Atap aıtqanda, Ulttyq jobany iske asyrý halyq úshin qolaıly ómir súrý ortasyn qurý jáne ekologııalyq jaǵdaıdy jaqsartý, qaldyqtardy óńdeý jáne olardy paıdalanýdyń ekologııalyq qaýipsizdigi ınfraqurylymyn qurý, kólderdiń sýy sapasyn jaqsartý, sondaı-aq sýarý kezindegi ysyrapty azaıtý múmkindigin beretin bolady.

«Taza Qazaqstan» atty birinshi baǵyt atmosferalyq aýanyń sapasyn jaqsartý, qaldyqtardy basqarý jáne elimizdiń sý obektileriniń ekojúıelerin saqtaý sııaqty negizgi ekologııalyq máselelerdi sheshýge yqpal etedi. Bul baǵyt aıasynda 5 jyldyń ishinde 16 iri ónerkásiptik kásiporynda shyǵaryndylardy 20%-ǵa tómendetý josparlanyp otyr. Qatty turmystyq qaldyqtardy bólektep jınaýǵa arnalǵan 8 myńnan astam konteıner ornatý, sondaı-aq olardyń úlesi men kádege jaratylýyn 18%-dan 34% -ǵa deıin ulǵaıtý josparlanǵan.

Sonymen qatar, sý obektileriniń ekojúıesin saqtaý bóliginde «Syrdarııa ózeni arnasyn retteý jáne Aral teńiziniń soltústik bóligin saqtaý» jobasynyń ekinshi kezeńin iske asyrý josparlanyp otyr. Balqash kóliniń basseıninde ornalasqan ózenderdiń sý kólemi men ótkizý qabiletin ulǵaıtý sharalary qarastyrylǵan.

Ekinshi baǵyt – «Únemdi Qazaqstan» dep atalady. «Sýdy únemdi paıdalaný arqyly ónimdilikti arttyrý» mindeti aıasynda 401 arnany rekonstrýktsııalaý jáne 212 arnany tsıfrlandyrý esebinen sýarý kezindegi sý ysyrabyn 4 tekshe shaqyrymǵa azaıtý josparlanǵan. Ulttyq jobada sýarylatyn jerlerdi 600 myń gektarǵa ulǵaıtý sharalary qarastyrylǵan.

Qosymsha sýarý kózderin qurý úshin 2025 jylǵa deıin Aqmola, Batys Qazaqstan, Jambyl, Qyzylorda jáne Túrkistan oblystarynda sý jınaý kólemi 1,7 tekshe shaqarymdy quraıtyn 9 jańa sý qoımasyn salý kózdelip otyr.

Bul baǵyttaǵy ekinshi mindet - ónerkásiptik kásiporyndardyń tehnologııalyq jabdyǵyn jańǵyrtý jáne bıýdjettik sektordaǵy jaryqtandyrýdy jańǵyrtý esebinen energııa tıimdiligin, onyń ishinde óńdeý ónerkásibinde arttyrý.

«Tabıǵat» baǵyty aıasynda ulasyp ósýi keminde 65 paıyzdy quraıtyn 2 mlrd. aǵash otyrǵyzý, sondaı-aq sırek kezdesetin jáne joıylyp bara jatqan janýarlardyń sanyn qalpyna keltirý sharalaryn júrgizý jónindegi Memleket basshysynyń tapsyrmasyn iske asyrý kózdelip otyr.

«Ekologııa bolashaǵy» atty tórtinshi baǵyt halyqtyń ekologııalyq bilimi men mádenıeti deńgeıin arttyrýǵa baǵyttalǵan.


Avtor Rýslan Ǵabbasov
Basty sózder: Ekologııa, Ulttyq joba,
Joǵary qaraı