Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

«Jaıly turǵyn úı» qazaqstandyqtardyń baspana jaǵdaıyn jaqsarta ala ma

2021 jyldyń 20 qazan 2021 16:51

NUR-SULTAN. QazAqparat – Taıaýda ǵana Memleket basshysy Qasym-Jomart Toqaev 10 ulttyq jobadan turatyn tizbeni bekitý týraly Jarlyqqa qol qoıǵan bolatyn.

Al olardyń ishindegi súbelisi - bazalyq qyzmetterge halyqtyń teń qoljetimdiligin qamtamasyz etý, turǵyn úı-kommýnaldyq jaǵdaıdy jaqsartý ári turǵyn úı qurylysyn damytý, sondaı-aq kóliktik baılanysty qamtamasyz etý jáne eldiń kóliktik-tranzıttik áleýetin joǵarylatý esebinen azamattardyń qolaıly ómir súrý ortasyn qurý mindetteri kózdelgen «Qýatty óńirler – el damýynyń draıveri» ulttyq jobasy ekeni sózsiz. Bes jyldyq jobany júzege asyrýǵa bólinetin qarajattyń kólemi de qomaqty. Naqtyraq aıtar bolsaq, 2021-2025 jyldary jobany júzege asyrýǵa 7 mlrd 567 mln teńge jumsalady. Onyń 4 mlrd teńgesi respýblıkalyq bıýdjetten, 785 mln teńgesi jergilikti bıýdjetten alynady. Al qalǵan 2 mlrd 759 mln teńgesi bıýdjetten tys qarajat esebinen bolmaq.

Elimizdiń Ulttyq ekonomıka mınıstrligi ázirlegen ulttyq joba negizgi qyzmetterge teń qoljetimdilik jáne kóliktik baılanysty qamtamasyz etý syndy baǵytta júzege asyrylady. Al onyń iske asyrýyna jaýapty vedomstvo – Indýstrııa jáne ınfraqurylymdyq damý mınıstrligi.

Jaýapty vedomstvolar usynǵan málimetterge qaraǵanda, ınfraqurylymdy keshendi damytý baǵyty 16 myń shaqyrym sýmen jabdyqtaý jáne káriz jelisin salý men qaıta qurýdy, 46 toptyq sý qubyryn qaıta qurýdy, 785 shaqyrym aǵyndy káriz jelisin jáne ırrıgatsııalyq aryq júıesin jańartýdy; 7,7 myń shaqyrym ınjenerlik jelilerdi jańǵyrtý jáne rekonstrýktsııalaýdy; 1 163 kópqabatty turǵyn úıdi jóndeýge bıýdjettik kredıt berýdi qamtıdy. Osy kózdelgen maqsattar júzege asyrylǵan jaǵdaıda 2025 jylǵa qaraı aýyz sýmen tolyq qamtamasyz etýge, qalalardaǵy aǵyndy sýlardy 100 paıyz tazartýǵa qol jetkiziledi. Kommýnaldyq qyzmetterdiń tozýy 55 paıyzdan 47 paıyzǵa deıin tómendeıdi. Birinshi baǵyt aıasynda «Aýyl - el besigi» jobasyn iske asyrý jalǵasyp, aýyl ishindegi 12 myń shaqyrym ınjenerlik jeli, 10 myń shaqyrym aýylishilik jol men 1,5 myń áleýmettik nysan salynady jáne jóndeledi. Bul tirek aýyldardaǵy joldardyń jaqsy jáne qanaǵattanarlyq jaǵdaıyn 100 paıyzǵa jetkizýge, 3,5 myńnan astam aýyldyń ınfraqurylymyn jańa aımaqtyq standarttarǵa sáıkestendirýge múmkindik beredi.

Sondaı-aq osy baǵyttyń «Jaıly turǵyn úı» mindetin sheshý úshin maqsatty topqa kiretin 185,1 myń adamǵa jeke turǵyn úı qorynan turǵyn úı jaldaý shyǵyndaryn sýbsıdııalaý, 102,3 myń áleýmettik jalǵa beriletin jáne kredıttik turǵyn úı salý, 25 mln sharshy metr turǵyn úı salý sııaqty qoldaý is-sharalary júzege asyrylady. Jumys isteıtin jastarǵa arnalǵan myń turǵyn úı, sonymen qatar aýyldyq jerlerde óz jumysshylaryna úı salǵan jumys berýshilerdiń shyǵyndaryn jabý kózdeledi. 235 myń jer ýchaskesi jańa turǵyn úımen jáne ınfraqurylymmen qamtamasyz etiledi.

Jalpy, aldaǵy 5 jyldyń ishinde barlyq qarjylandyrý kózderi esebinen 103 mln sharshy metr baspana salý kózdelip otyr. Bul rette Turǵyn úı qurylysynyń biryńǵaı operatory ákimdiktermen birge áleýmettik kredıttik baspana salýdy qarjylandyrýdy jalǵastyrady. Nátıjesinde 2025 jylǵa qaraı elimizde kezekte turǵan azamattar úshin 86 myńnan astam baspana salynady. Otbasy banki arqyly halyqqa 2 jáne 5 paıyzdyq jeńildikpen nesıe berý de jalǵasady. Ol úshin atalǵan ulttyq joba aıasynda 400 mlrd teńge bólý josparlanǵan. Bul qarajat kirisi 1 eń tómengi kúnkóriske jetpeıtin 63 myńnan astam kezekte turǵan azamatty qoldaýǵa múmkindik beredi.

Aıta keterligi, aldaǵy ýaqytta elimizde kredıt berýdiń biryńǵaı eń joǵary somasy 15-18 mln teńge sheginde bekitilmek. Bul rette aldyn ala turǵyn úı zaeminiń eń tómengi jarnasy 10 paıyz mólsherinde bekitilmek. Buǵan qosa, jeńildik baǵdarlamasyna qatysýshylar tizimi keńeıtilip, eń tómengi kúkóristiń shekti mólsheri ulǵaıtylmaq. Sonymen qatar Otbasy bankine ulttyq qoldaý ınstıtýty mártebesin berý máselesi de pysyqtalyp jatyr.

Ulttyq jobanyń ekinshi baǵyty ishki kólik jelisin damytýdy jáne aýmaqtardyń syrtqy baılanysyn arttyrýdy qamtıdy. Ol 11 myń shaqyrym respýblıkalyq joldardy jáne 27 myń shaqyrym jergilikti mańyzy bar avtomobıl joldaryn salý jáne qaıta jańartý esebinen qamtamasyz etiledi. Bul jaqsy jáne qanaǵattanarlyq jaǵdaıdaǵy respýblıkalyq mańyzy bar avtomobıl joldarynyń úlesin 100 paıyzǵa deıin jáne jergilikti mańyzy bar avtomobıl joldarynyń úlesin 95 paıyzǵa deıin arttyrady.

Ulttyq jobany iske asyrý nátıjesinde 2025 jyly astananyń, respýblıkalyq mańyzy bar qalalardyń jergilikti óńirlik ósimin jyl saıyn 3,9 paıyzǵa ulǵaıtý; tranzıttik júk legin 22,7-den 30 mln tonnaǵa deıin arttyrý kózdeledi. Sondaı-aq Qazaqstannyń Dúnıejúzilik ekonomıkalyq forýmnyń Jahandyq básekege qabilettilik reıtıngindegi pozıtsııasyn «Infraqurylym» kórsetkishi boıynsha 62-den 49-ǵa deıin; Dúnıejúzilik bank reıtınginde «Logıstıka tıimdiligi» kórsetkishi (LPI) boıynsha 71-den 50-ge deıin jaqsartý kútiledi. Munan bólek 491,1 myń jumys orny, onyń ishinde 15,7 myń turaqty jumys orny; 475,4 myń ýaqytsha jumys orny qurylmaq. Ýrbandalý deńgeıi 59,1 paıyzdan 62,6 paıyzǵa deıin ulǵaıtylyp, oblys ortalyqtaryndaǵy halyq sany jyl saıyn 1,7 paıyzǵa artyp otyratyn bolady.


Joǵary qaraı