Aýa raıy
Astana -19 °S
Almaty -6 °S
valıýta baǵamy
USD 421.58
EUR 496.83
RUB 5.53
CNY 62.20

Jedel járdem júrgizýshileri aıyppuldy óz qaltasynan tólemeıdi - departament

2020 jyldyń 27 qarasha 2020 16:21

ALMATY. QazAqparat - Almatyda jedel járdem kóliginiń júrgizýshileri jol erejeleri boıynsha salynatyn aıyppulǵa shaǵymdandy. Olar endi aıyppuldy óz qaltalarynan tóleıdi. Osy máselege qatysty qalalyq qoǵamdyq densaýlyq saqtaý basqarma bastyǵynyń mindetin ýaqytsha atqarýshy Janar Madeeva túsinik berdi, dep habarlaıdy QazAqparat tilshisi.

Onyń aıtýynsha medıtsınalyq jedel járdem qyzmeti basshylyǵy bul máseleni únemi baqylaýda ustap, jol polıtsııasy basqarmasymen birlesip jumys isteıdi.

«Jedel járdem kóligi shaqyrtýǵa shyqqanda mindetti túrde dybystyq dabyl qosylady. Osy kezde jol erejeleri de buzylady. Bul jaǵdaıda aıyppuldy júrgizýshiler tólemeıdi. Munyń bári jol polıtsııasy basqarmasymen pysyqtalyp, aıyppul alynyp tastaldy. Eger kólikte dabyl qosylmasa jáne ol stantsııaǵa qaıtyp kele jatqanda buzýshylyqtarǵa jol berilse, onda aıyppul júrgizýshige jiberiledi. Biraq búgingi tańda birde bir júrgizýshi aıyppuldy óz qaltasynan tólegen joq. Biz osy másele boıynsha jol polıtsııasymen jumys istep jatyrmyz», - deıdi ol.

Sonymen qatar, ol buzylyp qalǵan jedel járdem kóliginiń qosalqy bólshekterin júrgizýshiler satyp almaıtynyn jetkizdi.

«Jedel járdem qyzmetiniń avtokólik jóndeý sheberhanalary bar. Bizdiń jedel járdem qyzmeti arnaıy kólik jóndeıtin kompanııamen jumys isteıdi. Bul maqsatqa 130 mln astam teńge bólingen. Qajet bolǵan jaǵdaıda jóndeýge jiberiledi. Eger jedel járdem kóliginiń buzylýyna júrgizýshi kináli bolsa, onda jóndeý jumystarynyń shyǵynyn júrgizýshi tóleıdi», - dep túsindirdi ol.


Avtor Alma Muqanova
Basty sózder: Almaty, Qoǵam, Jol,
Joǵary qaraı