Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Jeńis Qasymbek turǵyndar qaýipsizdigin qadaǵalaýdy kúsheıtýdi tapsyrdy

2021 jyldyń 14 maýsym 2021 22:41

QARAǴANDY. QazAqparat – Qaraǵandy oblysynyń ákimi Jeńis Qasymbek turǵyndardyń qaýipsizdigin baqylaýdy kúsheıtýdi talap etti. Mundaı tapsyrmany óńir basshysy tek qala-aýdan ákimdikterine ǵana emes, sonymen qatar kommýnaldyq qyzmetterge, merdigerlerge de berdi, dep habarlaıdy QazAqparat tilshisi.

«Jumystaǵy kez kelgen nemquraıdylyq qaıǵyly jaǵdaıǵa ákelýi múmkin», - dep atap ótti Jeńis Qasymbek onlaın rejımde ótken apparattyq keńeste.

Oblys ákimi barlyq eldi mekenderde qaýipti bolýy yqtımal jerlerdi tekserýdi, ásirese jerde jatqan ashyq symdary bar jerlerdi jáne basqa aýmaqtardy nazardan tys qaldyrmaýdy tapsyrdy.

«Qaraǵandy qalasynyń aýdan ákimdikteriniń ótinishterinen keıin qala turǵyndary áleýmettik jelilerde nysandardaǵy ashyq symdardyń sýretterin jappaı jarııalap jatqanyn kórip otyrmyn. Barlyq faktilerge jedel áreket etińizder!» – dedi Jeńis Qasymbek

Sondaı-aq, ákim balalar alańdarynyń qaýipsizdigin qamtamasyz etýge qatysty osyǵan deıin bergen tapsyrmasyn eske saldy.

«Merdigerler kemshilikterdi túzetýge asyǵar emes. Kezekti tótenshe oqıǵa bolǵanyn kútip otyrsyzdar ma? Ákimdikterge balalardyń barlyq oıyn alańdaryn taǵy bir ret tekserýdi tapsyramyn. Sondaı-aq, kommýnaldyq qyzmetterge jóndeýden keıin aýmaqty tazalaý týraly birneshe ret aıtqanbyz, biraq turǵyndardan shaǵym azaımaı otyr. Qaıtalap eskrtemin, sizderden keıin shuńqyrlar, qazylǵan joldar jáne adamdar úshin basqa da qolaısyzdyqtar qalmaýy tıis. Turǵyndardyń qaýipsizdigi máselesinde esh nemquraılylyq bolmaýy tıis. Ýaqyt óte kele barlyǵy umytylyp, jabýly qazan jabýly kúıinde qalady dep oılamańyzdar», – dep atap ótti Jeńis Qasymbek.

Oblys ákimi apta saıyn atqarylǵan jumystar týraly baıandap otyrýdy tapsyrdy.

Esterińizge sala keteıik, 9 maýsymda Qaraǵandynyń «Gornıak» bazarynda 32 jastaǵy er adam kenetten kóz jumdy.

Sot-medıtsınalyq saraptama marqumnyń elektr togy soqqannan qaıtys bolǵany týraly qorytyndy jasady.


Joǵary qaraı