Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Jeńis kúni qarsańynda Qaraǵandy oblysynan 40 jas áskerge attandy

2021 jyldyń 8 mamyr 2021 22:46

QARAǴANDY. QazAqparat – Qazaqstan armııasy Qaraǵandy oblysynan shaqyrylǵan sarbazdarmen tolyqty. Óńirde kóktemgi shaqyrý jalǵasýda. Áskerge saltanatty shyǵaryp salý Otan qorǵaýshylar kúni men Jeńis kúni qarsańynda ótti. Saltanatty sharaǵa oblys ákimi Jeńis Qasymbek keldi, dep habarlaıdy QazAqparat tilshisi.

Óńir basshysy áskerge shaqyrylýshylardy merekemen quttyqtap, tabysty qyzmet atqarýdy tiledi.

«Sizder búgin jańa ómir bastap jatyrsyzdar. Sizderdi alda úlken ózgerister kútip tur: jańa ómirlik tájirıbe men rýhanı shynyǵý, naǵyz er adamnyń jumysy – Otandy qorǵaý. Qıyndyqtar bolady, bul ońaı bolmaıdy, biraq sizder bizdiń aımaqtyń abyroıy men ózderińizdiń abyroılaryńyzdy túsirmeý úshin qoldan kelgenniń barlyǵyn isteýlerińiz kerek. Sizder tek týystaryńyz ben jaqyndaryńyzdyń ǵana emes, jalpy elimizdiń tiregi jáne úmitisizder. Elge qyzmet etýge daıyn bolǵandaryńyz úshin, Otanǵa adal bolǵandaryńyz úshin rahmet!» – dep Jeńis Qasymbek áskerge shaqyrylýshylarǵa úndeý joldady.

Búginde áskerge oblystyń ár óńirinen 40 adam shaqyryldy. Olardyń barlyǵy Aqtaýdaǵy áýe shabýylyna qarsy qorǵanys áskerlerinde qyzmet etedi.




«Qaraǵandy oblysynan áskerge shaqyrylýshylar Qazaqstannyń barlyq óńirlerinde qyzmet etedi. Bul olardyń áskerı qyzmet ótkerý kezinde kez kelgen klımattyq jaǵdaılarǵa beıimdelýine, sondaı-aq kez kelgen taktıkalyq oqý-jattyǵýda óz daǵdylaryn qoldana bilýine baılanysty», – dedi Qaraǵandy oblysy Qorǵanys isteri jónindegi departamenti bastyǵynyń orynbasary Rýstam Jalbınov.

Áskerge shaqyrylýshylardyń jasy – 18-den 27 jasqa deıin. Áskerı qyzmet bir jylǵa sozylady. Kóptegen adamdar úshin bul ómirlik tájirıbe ǵana emes, sonymen birge fızıkalyq jáne rýhanı shynyǵý.




«Ózim qyzmet etýge sheshim qabyldadym. Otbasymda áskerı adamdar joq. Men Balqashtanmyn, jasym 23-te. Men elıtalyq áskerge túskenimdi maqtan tutamyn», – deıdi Aleksandr Bashkatov.

Kóktemgi shaqyrý 1 naýryzdan bastalyp, 30 maýsymǵa deıin jalǵasady. Bıyl áskerge barlyǵy 1 268 adam attanady. Olardy QR UQK Shekara qyzmetine, Memlekettik kúzet qyzmetine, Qorǵanys mınıstrligine, Ulttyq ulanǵa, TJM jiberedi.


Joǵary qaraı