Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Jer reformasy: jaıylym jetispeýshiligi máselesin qalaı sheshýge bolady

2021 jyldyń 17 sáýir 2021 11:33

NUR-SULTAN. QazAqparat – Qazaqstanda aýyldyq mekenderdiń malyna 29 mln gektar jaıylym jetispeıdi. Bul máseleni Jer reformasy jónindegi komıssııanyń Ekonomıkalyq jumys tobynyń basshysy Aqylbek Kúrishbaev kóterdi, dep habarlaıdy QazAqparat.

«Qazir aýyldyq eldi mekenderdiń eń ózekti máselesiniń biri – olardyń aınalasyndaǵy jaıylym tapshylyǵyna baılanysty. Statıstıkalyq málimetke sáıkes, aýyldyq eldi mekenderde mal sharýashylyǵy óniminiń 66 paıyzy óndiriledi. Mal basynyń 60 paıyzy osynda. Ózderińizge belgili, aýyldaǵy aǵaıynnyń kúnkórisi de osy malǵa baılanysty. Ókinishke qaraı, bul orasan bıologııalyq aktıv memlekettik qoldaýdan tys qalyp, eshqandaı tehnologııalyq protsesterge tartylmaı otyr. Mamandardyń esebi boıynsha, eger biz tek qana mal azyǵynyń sapasyn kótersek, eldi mekenderde óndiriletin et pen súttiń ónimdiligi kem degende 30 paıyzǵa ulǵaıady. Jumys tobynyń mamandary bul máselege baılanysty kóptegen usynystar engizdi. Eń negizgisi – aýyl sharýashylyǵynda paıdalanbaı jatqan jerlerdi eldi mekenderge qaıtarý», - dedi A. Kúrishbaev Aýyl sharýashylyǵy mınıstrliginde ótken Jer reformasy jónindegi komıssııa otyrysynda.

QR AShM málimeti boıynsha, aýyldyq mekenderdiń malyna 29 mln gektar jaıylym jetispeıdi. Al uıymdastyrylǵan sharýashylyqtarda 33 mln gektar jaıylym ıgerilmeı jatyr.

«Oǵan qosa, komıssııanyń ótken otyrysynda orman qorlarynda erekshe qorǵalatyn aımaqtar sheginde 10 mln gektar jerdiń tıimsiz paıdalanyp jatqanyn aıtqanbyz. Biraq bul máselede jumys istep jatqan sharýashylyqtarǵa eshqandaı qysym, ıaǵnı jerdiń eksproprıatsııasy bolmaýy kerek. Olarǵa ornyna basqa jaıylymdy jerler berip, jumsaǵan shyǵynyn ótep berýimiz qajet. Sonymen qatar, aýyldardyń sanıtarlyq jaǵdaıyn qamtamasyz etý óte mańyzdy. Biz aýyldardy qoǵamdyq jaıylymdarmen qamtamasyz etip, mal sharýashylyǵyn tıimdi damytý úshin kooperatıvter quryp, jańa fermerlik sharýashylyqtardy uıymdastyrýymyz kerek. Jumys tobynda jaıylym týraly zańdy kúsheıtý, qosalqy sharýashylyq týraly arnaıy zań qabyldaý usynystary aıtyldy», - deıdi Aqylbek Kúrishbaev.

Qorytyndylaı kele, spıker memlekettiń bul máseleni qysqa merzimde sheshýge barlyq múmkindigi bar ekenin aıtty.

«185 mln gektar jaıylymdyq jeri bar jáne osy kórsetkish boıynsha álemde 5-oryndaǵy el bola otyryp, aýyldyq jerdegi maldy ash qursaqta qaldyrý – keshirilmeıtin áreket. Atalǵan máseleni sheshýde barlyq deńgeıdegi ákimderge saıası erik pen tabandylyq kerek. Tipti, bul jumys ákimderdiń qyzmetin baǵalaýdyń negizgi kórsetkishi bolýy kerek dep sanaımyz. Osy iske memlekettik asa mańyzy bar ulttyq joba retinde qaraýǵa tıispiz, óıtkeni sol aýyldarda turatyn kópshiligi – ózimizdiń qazaǵymyz», - dedi jumys tobynyń basshysy.


Joǵary qaraı