Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Jergilikti qamtýdyń ósý qarqyny 6,4 paıyzdy qurady - Asqar Mamın

2021 jyldyń 23 qarasha 2021 10:12

NUR-SULTAN. QazAqparat – Bıyl 9 aıdyń ishinde jergilikti qamtýdyń ósý qarqyny ótken jyldyń sáıkes kezeńimen salystyrǵanda 6,4 paıyzdy qurady. Bul týraly elimizdiń Premer-Mınıstri Asqar Mamın Úkimet otyrysynda málim etti, dep habarlaıdy QazAqparat tilshisi.

«Bıyl 9 aıda jergilikti qamtýdyń ósý serpini ótken jyldyń sáıkes kezeńimen salystyrǵanda 6,4 paıyzdy qurady. Qarapaıym zattar ekonomıkasynyń 7 salasy boıynsha jergilikti qamtýdyń josparly kórsetkishterine qol jetkizildi, onyń ishinde mashına jasaý, farmatsevtıka, jeńil, jıhaz, hımııa jáne tamaq ónerkásibi. Bul rette, qurylys materıaldary óndirisinde josparly kórsetkishke - 77,3 paıyzǵa qol jetkizilgen joq. Biraq bizde áli 1,5 aı bar. Bul sala naryqta zor áleýet pen suranysqa ıe. Qarapaıym zattar ekonomıkasy taýarlaryn óndirýde jergilikti qamtý úlesi boıynsha Shyǵys Qazaqstan jáne Qostanaı oblysy óńirler reıtınginiń kósh basynda. Al SQO men Almaty qalasy eń tómen kórsetkishke ıe», - dedi Asqar Mamın.

Sondaı-aq Premer-Mınıstr jergilikti qamtýdy damytý ákimderdiń negizgi mindetteriniń biri ekenin atap ótip, olardyń jumysy osy mindet boıynsha baǵalanatynyn aıtty.

«Jergilikti qamtýdy baqylaý jónindegi óńirlik komıssııalardyń jumysyn jandandyryp, onyń jumysyna otandyq taýar óndirýshilerdi barynsha tartý qajet. Atalǵan komıssııalardyń jumysy Aqmola, Soltústik Qazaqstan, Túrkistan, Jambyl jáne Qyzylorda oblystarynda nashar uıymdastyrylǵan. Bul rette qazaqstandyq qamtýdyń damýyn qamtamasyz etý úshin barlyq qajetti sharalar qabyldanýda. Mysaly, ofteık-kelisimsharttar, taýarlardyń elektrondyq katalogy, jer qoınaýyn paıdalanýshylarmen erikti kelisimsharttar sııaqty jańa quraldar engizildi», - deıdi ol.

Odan bólek, Úkimet basshysy elimizde munaı-gaz mashınasyn jasaýdy damytýdyń halyqaralyq ortalyǵy jáne jergilikti qamtýdy damytý qory qurylǵanyn eske saldy.

«Samuryq-Qazyna qory kompanııalarynyń satyp alýdaǵy jergilikti qamtý 75% qurap otyr. Bul oń tájirıbeni kvazımemlekettik jáne memlekettik sektorlardyń basqa kompanııalaryna da taratý kerek», - dedi A. Mamın.


Joǵary qaraı