Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Jergilikti ónim úlesin arttyrý - ımportqa táýeldilikti azaıtyp, baǵany turaqtandyrady – Premer

2022 jyldyń 14 mamyr 2022 16:51

NUR-SULTAN. QazAqparat - QR Premer-Mınıstri Álıhan Smaıylov Aqtóbe oblysyna jumys sapary barysynda birqatar mańyzdy ınfraqurylymdyq jáne óndiristik nysandardy aralady, sondaı-aq aýyl sharýashylyǵy qurylymdarynyń basshylarymen jáne ekobelsendilermen kezdesý ótkizdi, dep habarlaıdy QazAqparat Úkimettiń resmı saıtyna silteme jasap.




Atap aıtqanda, Úkimet basshysy «Aqtóbe – Atyraý – RF shekarasy» avtojolynyń ýchaskesin rekonstrýktsııalaý barysymen tanysty. Ýchaskeniń uzyndyǵy – 96 shaqyrym, onyń 77 shaqyrymy 1-tehnıkalyq sanatqa sáıkestendiriledi. Joba boıynsha jumystar 2023 jyly tolyǵymen aıaqtalýy tıis. Osy jyldyń sońyna deıin merdigerler eki jolaqty asfalttaý jumystaryn aıaqtap, Qandyaǵash qalasyna deıin kólik qatynasyn ashýdy josparlap otyr.




Premer-Mınıstr qazirgi ýaqytta halyqaralyq tranzıttik dálizdermen qosa, Qazaqstandaǵy joldardyń jelisi belsendi túrde damyp kele jatqanyn atap ótti.

Aqtóbe oblysynyń avtomobıl joldaryn salýǵa jáne rekonstrýktsııalaýǵa bıyl 50,3 mlrd teńge baǵyttaldy. Jyl qorytyndysy boıynsha normatıvtik talaptarǵa sáıkes respýblıkalyq joldardyń úlesi 87%-ǵa, al jergilikti joldar 72%-ǵa deıin jetkizilýi tıis.




«Ákimdik jumystardy jergilikti bıýdjetten birlesip qarjylandyrýdy ýaqytly qamtamasyz etýi tıis. Sonymen qatar, salalyq vedomstvo «Aqtóbe – Ulǵaısyn» avtojolynyń qurylysyn qarjylandyrý tetikterin anyqtap, jumysqa kirisýi qajet», - dedi Álıhan Smaıylov.

Hromtaý aýdanynda Premer-Mınıstr «AKMEZ» JShS maı ekstraktsııalyq zaýytynda boldy. Kásiporynnyń jobalyq qýaty – jylyna 21 myń tonna shıki ósimdik maıy jáne 26 myń tonna kúnjara. Zaýyt ónimi ishki naryqta suranysqa ıe, sondaı-aq Qytaıǵa, Reseıge, Ózbekstanǵa jáne Tájikstanǵa jetkiziledi.




Álıhan Smaıylov aýyl sharýashylyǵynda ınvestıtsııalyq jobalardy iske qosý - elimizdiń azyq-túlik qaýipsizdigin qamtamasyz etý jolyndaǵy basty mindet ekenin atap ótti.

Búgingi tańda Úkimet sharýalardy keshendi túrde qoldaý sharalaryn iske asyryp otyr. Atap aıtqanda, ınvestıtsııalyq shyǵyndardy sýbsıdııalaý, sondaı-aq aınalym qarajatyn tolyqtyrýǵa arnalǵan kredıtter boıynsha paıyzdyq mólsherlemeler jáne qaıta óńdeýge arnalǵan jabdyqtar lızıngi qarastyrylǵan.

«Osyndaı qoldaýdyń jáne klımat erekshelikteriniń arqasynda Aqtóbe oblysynda mal sharýashylyǵy, onyń ishinde sút ónimderi óndirisi qarqyndy damyp keledi. Oblys turǵyndaryn jergilikti ónimmen qamtamasyz etý jáne ony basqa óńirlerge jetkizýdi uıymdastyrý maqsatynda atalǵan jumysty jalǵastyrǵan jón. Bul ımportqa táýeldilikti azaıtýǵa jáne ishki naryqtaǵy baǵany turaqtandyrýǵa jol ashady», - dep atap ótti Úkimet basshysy.




Kásiporynda Premer-Mınıstr birqatar aýyl sharýashylyǵy qurylymdarynyń basshylarymen kezdesip, agroónerkásiptik keshendi damytýdyń problemalyq máselelerine talqylady. Atap aıtqanda, fermerlerdi memlekettik qoldaý, sýbsıdııalaý, aýyl sharýashylyǵy maqsatyndaǵy jerlerdi bólý, mal sharýashylyǵyn damytý máseleleri qyzyqtyrdy.

«Osy jyldyń sońyna deıin biz sharýalarmen birqatar kezdesý ótkizip, sýbsıdııalaý júıesin reformalaý máselelerin talqylaımyz. Tıisti qujat bes jyl merzimge qabyldanady. Jalpy, Úkimet aýyl sharýashylyǵy salasyn qoldaý sharalaryn keńeıtip jatyr. Bıyl biz bıýdjetti eki ese arttyrý múmkindigin qarastyrdyq. Bul – azyq-túlik qaýipsizdigin qamtamasyz etý, ishki óndiristi qoldaý jáne ınflıatsııany tejeý máselelerine baılanysty», - dep atap ótti Álıhan Smaıylov.




Odan keıin Premer-Mınıstr «Zerde Keramıka Aqtóbe» JShS-niń keramogranıt jáne qysh taqtasha óndiretin jańa zaýytynyń qyzmetimen tanysty. «Aqtóbe» ındýstrııalyq aımaǵy men Ónerkásipti damytý qory jelisi boıynsha memlekettik qoldaý alǵan kásiporyn óz ónimin ishki naryqqa da, eksportqa da jetkizedi.




Sondaı-aq, munda qýaty jylyna 650 myń tonna joǵary qospalanǵan bolat óndirýge eseptelgen balqytý zaýyty qurylysynyń jobasy tanystyryldy. Jobany iske asyrý búginde shamamen $1 mlrd kóleminde ımporttalatyn qurylys armatýrasyn otandyq ónimmen almastyrýǵa múmkindik beredi.




Premer-Mınıstr elimizde qurylys materıaldaryna degen suranystyń jyl saıyn artyp kele jatqanyn atap ótti. Osyǵan baılanysty Úkimet 2025 jylǵa deıin qurylys salasyna shamamen 1 trln teńge ınvestıtsııa salýdy josparlap otyr. Atap aıtqanda, 160-qa jýyq jańa jobany iske asyrý jáne 15 myńnan astam jumys ornyn qurý josparda bar.




Jumys saparynyń kelesi pýnkti - «Qazhrom» TUK» AQ Aqtóbe ferroqorytpa zaýytynyń qyzmetimen tanysý boldy. Qazirgi tańda taý-ken metallýrgııa kesheni el ekonomıkasynyń damýyna eleýli úles qosyp keledi. Sala jyl saıyn 6% deńgeıinde turaqty ósimdi kórsetip otyr, al ınvestıtsııalar ósimi ótken jyly 20%-ǵa artqan.




Sondaı-aq, Álıhan Smaıylov ekologııa salasyndaǵy qoǵamdyq birlestikterdiń ókilderimen kezdesti. Turǵyndar atynan óńirdiń eń ótkir ekologııalyq problemalary týraly «Aqtóbe, tynys al!» volonterler qozǵalysynyń jetekshisi Evgenıı Lazarchýk aıtyp berdi. Ol ferroqorytpa zaýytyna jaqyn mańda ornalasqan aýdandardyń turǵyndaryn kóshirý, Aqtóbe qalasynyń káriz-tazartý qurylystary júıesin jańǵyrtý jáne jerdiń shóleıttený problemalaryn kóterdi.




Álıhan Smaıylov árbir aıtylǵan máseleniń mán-jaıyn túsindire kele, oblys ákimdigine múddeli salalyq memlekettik organdarmen birlesip, olardy jedel sheshý máselelerin pysyqtaýdy tapsyrdy.




Jumys saparynyń sońynda Úkimet basshysy Aqtóbe qalasynyń «Batys-2» shaǵyn aýdanyna baryp, oblys ortalyǵynyń ınfraqurylymdyq damýymen tanysty.



Joǵary qaraı