Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Joldaý júktegen mindetter: Prezıdent tapsyrmalary Shyǵys Qazaqstanda qalaı oryndalady

2021 jyldyń 17 qyrkúıek 2021 09:28

ÓSKEMEN. QazAqparat – Memleket basshysy Qasym-Jomart Toqaevtyń bıylǵy Joldaýynda birqatar bastama kóterilip, jańa baǵyttar aıqyndalǵany belgili. Endi sol mindetterdi iske asyrý joldary, baǵyt-baǵdary tańdalýy tıis. Shyǵys Qazaqstan oblysynda Prezıdent tapsyrmalaryn oryndaý úshin júıeli jospar jasalyp jatyr. Óńir ákimi Danıal Ahmetovtyń aıtýynsha, balalar sporty damytylyp, aýyl sharýashylyǵy ónimderiniń eksporty artyp, IT mamandyqtar boıynsha grant sany kóbeıedi, dep habarlaıdy QazAqparat tilshisi.

Balalar sporty - basty nazarda

Prezıdent Qasym-Jomart Toqaevtyń «Halyq birligi jáne júıeli reformalar – eldiń órkendeýiniń berik negizi» atty Joldaýyn talqylaý maqsatynda oblys ákimdiginde jınalys ótti. Jıynda Memleket basshysynyń bastamalary talqyǵa salynyp, tapsyrmalardyń iske asyrylý barysy sóz etildi.

«Joldaýda balalar sportyn damytý jóninde aıtylǵan. Osy baǵytta óńirde 2025 jylǵa deıin jalpy bilim beretin mektepterde qosymsha 3213 sport sektsııasy ashylady. Bıyl 22 myń balany qamtıtyn 1268 sektsııa óz jumysyn bastamaq, - dedi oblys ákimi Danıal Ahmetovóz óz sózinde.

Sondaı-aq óńirde sport sektsııalaryn qarjylandyrýǵa arnalǵan memlekettik tapsyrys júıesin engizýdiń arqasynda balalardy tartý birneshe esege artady. Qazirde balalar men jasóspirimderdiń 109 myńy nemese jalpy sanynyń 56,4%-y sportpen tegin aınalysýǵa múmkindik alǵan. Ótken jyly olardyń sany 85 myń bolǵan edi.

Aımaq basshysynyń aıtýynsha, Shyǵys Qazaqstanda úsh iri maı ekstraktsııalaý zaýyty boı kótermek.

Sonyń nátıjesinde, 1 mıllıon tonnaǵa deıin maıly daqyldar óńdeletin bolady.

«Oblysta aýyl sharýashylyǵy salasyna erekshe nazar aýdarylǵan. Negizgi mindetterdiń biri – jemshóp daqyldarynyń egis alqaptaryn ulǵaıtý. Investıtsııalyq jobalardyń arqasynda 2025 jylǵa qaraı osy maqsattaǵy egis alqaby 28 myń gektarǵa ulǵaıtylady. Eń aldymen eksportqa arnalǵan ónim kólemin arttyrý kózdelip otyr. Jospar boıynsha aldaǵy jyldary aýyl sharýashylyǵy ónimderiniń eksporty 4 esege ósedi. Sondyqtan ónimdilikti, jaıylym alqaptaryn kóbeıtýdi, aýyl sharýashylyǵy tehnıkasy parkin jańartý jáne óndiristerdi jańǵyrtý boıynsha jumysty jalǵastyramyz. Sondaı-aq veterınarııa salasyn damytýdyń da keshendi josparyn ázirleý qajet», - dedi Danıal Ahmetov.

Memleket tilge erekshe kóńil bólinedi

Prezıdent Joldaýynda qazaq tilin nasıhattap, eldiń mádenı-tarıhı murasyn zerdelep jáne tıimdi paıdalaný qajettigin aıtqan. Osy oraıda Shyǵys Qazaqstanda ózge ulttarǵa qazaq tilin úıretýge erekshe kóńil bólinedi.

«Bul maqsatta Qazaqstan halqy Assambleıasynyń Dostyq úıleri, «Vozrojdenıe» til mektebi, lıngvıstıkalyq kabınetter jan-jaqty jumys júrgizýde. Oblysta «Sıtýatsııalyq qazaq tili» jobasy iske asyrylýda. Bul aýyzeki tildi úırenýdiń eń qarapaıym jáne tıimdi tásili bolyp otyr. Arheologııalyq zertteýler baǵdarlamasyn júzege asyrýdy jalǵastyramyz. Osynyń arqasynda belgili arheologtar Zeınolla Samashev pen Ábdesh Tóleýbaev sensatsııalyq ashýlar jasaýda. Biregeı artefaktilerimiz ben arheologııalyq oljalarymyzdy halyqaralyq deńgeıge shyǵarýǵa daıynbyz. Osy jyldyń 28 qyrkúıeginen bastap 2022 jyldyń 30 qańtaryna deıin «Uly dala altyny» kórmesi Ulybrıtanııadaǵy Kembrıdj ýnıversıtetine qoıylatyn bolady. Bul Qazaqstannyń tarıhı murasyn ilgeriletýdegi mańyzdy qadam, - dedi ShQO ákimi.

Sonymen qatar 3 tomdyq «Shyǵys Qazaqstannyń ejelgi dáýiri» jáne «Qazaqstan tarıhy» monografııalaryn basyp shyǵarýǵa daıyndyq jumystary júrgizilýde.

Joldaýda aıtylǵan bastamalardyń biri – 2022-2025 jyldar aralyǵynda bıýdjet salasynyń keıbir qyzmetkerleriniń jalaqysyn jyl saıyn 20 paıyzǵa arttyrý.

«Bul sheshim 42 myńǵa jýyq jerlesimizge qatysty bolmaq. Sondaı-aq Memleket basshysynyń zeınetaqy qoryndaǵy jetkiliktilik sheginen asatyn jınaqty «Otbasy bankine» aýdarýǵa ruqsat berý kerek dep sanaıtyny erekshe mańyzǵa ıe. Prezıdenttiń alǵa qoıǵan jańa maqsattary bizge strategııalyq mindetterge sáıkes, shekara mańyndaǵy aýmaqtar men burynǵy aýdan ortalyqtaryn damytýdy eskere otyryp, oblystyń damý josparyn aıqyndaýǵa múmkindik beredi, - dedi Danıal Ahmetov.

Onyń aıtýynsha, bıznesti keńinen qoldaý boıynsha jumys júıeli túrde jalǵasatyn bolady. Sońǵy 2 jylda óńirde 3 myńǵa jýyq jobany iske asyrýǵa memleket tarapynan 5,4 mlrd teńge bólingen.

Bilikti mamandar daıyndalmaq

«Qasym-Jomart Kemeluly IT-sektordy jas ári yntaly kadrlarmen kúsheıtýdi, keminde 100 myń joǵary bilikti maman daıyndaýdy tapsyrdy. Osy maqsatta oblysta IT-mamandyqtar boıynsha granttar sanyn jyl saıyn 10 paıyzǵa arttyrý qajet. Sondaı-aq bilim berý uıymdarynyń bazasynda halyqaralyq standarttar boıynsha baǵdarlamalaý kabınetterin ashý kerek», - dedi óńir basshysy.

Óz sózinde ol Shyǵys Qazaqstanda atalmysh salany damytý úshin birqatar shara atqarylyp jatqandyǵyn aıtty.

«Máselen, búginde oblysta vedomstvoaralyq biryńǵaı ahýaldyq ortalyq jumys isteýde. Sonyń nátıjesinde, jyl basynan beri 6 myńnan astam ákimshilik quqyq buzýshylyq pen qylmys ashylyp, 1,3 mlrd teńge aıyppul óndirilgen», - dedi Danıal Ahmetov.

Osylaısha, oblysta Prezıdent tapsyrmalaryn iske asyrýdyń joldary aıqyndala bastady. Endi baǵyttyń durystyǵyn, jumystyń nátıjeligin ýaqyt kórsetedi.


Joǵary qaraı