Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

«Jomart túlek-2021»:  Tanymal jambyldyqtar áleýmettik máselelerdi sheshýge kómektesedi

2021 jyldyń 26 aqpan 2021 13:29

TARAZ. QazAqparat – Tarazda Qazaqstan Táýelsizdiginiń 30 jyldyǵyna oraı «Rýhanı jańǵyrý» baǵdarlamasy aıasynda «Jomart Túlek-2021» kezdesýi ótti, dep habarlaıdy QazAqparat tilshisi.

Sharaǵa qonaq retinde oblystaǵy mektep túlekteri – qazirgi tańda óńirdiń atyn shyǵaryp júrgen belgili qoǵam qaıratkerleri, tanymal ánshi-sazgerler, sportshylar, ǵalymdar, kásipkerler qatysty. Kezdesýdi ashqan Jambyl oblysynyń ákimi Berdibek Saparbaev bul júzdesýdiń mán-mańyzdylyǵyna toqtaldy.

«Basty maqsat – elimizge belgili túrli salada jemisti eńbek etip júrgen túlekterdiń tabysty ómir jolyn jas urpaqqa úlgi etý, tanymal jambyldyqtardyń týǵan ólkesiniń áleýmettik máselelerin sheshýge atsalysýǵa tarta otyryp, áleýmettik bastamalardy júzege asyrý jolyndaǵy ómirlik tájirıbelerimen bólisý jáne áleýmettik mańyzdy jobalardy júzege asyrý bolyp tabylady. «Jomart túlek» jobasy aıasynda jambyl-tylek.kz. saıty iske qosylǵan desek, qazir oǵan 80 myńǵa jýyq túlek tirkelgen. Sońǵy bes jyl ishinde bizdiń túlekter týǵan mektebine, aýylyna jalpy somasy 2 mıllıard teńge kóleminde demeýshilik kómek kórsetti. «Týǵan jer» jobasy aıasynda 5,5 mıllıard teńge somasyna 30-dan astam áleýmettik jobany iske asyrý usynylýda»,-dedi oblys ákimi.

San salada el damýyna súbeli úles qosyp júrgen tanymal túlekter jetistikke jetý tájirıbesimen jáne týǵan aýyldary týraly estelikterimen bólisti. Olardyń birqatary arnaıy kelip qatyssa, keıbireýleri beıne-baılanys arqyly qosyldy.

Qonaqtardyń qatarynda Qazaqstannyń Eńbek Eri, KSRO-nyń Halyq ártisi, teatr jáne kıno akteri, rejısseri, pedagog, professor Asanáli Áshimov, tuńǵysh Prezıdent – Elbasy Keńsesiniń basshysy Mahmud Qasymbekov, memleket jáne qoǵam qaıratkeri Ómirbek Baıgeldi, memleket jáne qoǵam qaıratkeri, ǵalym, jazýshy, akademık Myrzataı Joldasbekov, Halyq Qaharmany Baqytjan Ertaev, Qazaqstannyń Eńbek Eri, Qazaq KSR Halyq aǵartý isiniń

úzdigi Aıagúl Mırazova, Qazaqstannyń Halyq ártisi Altynbek Qorazbaev, «Abaı atyndaǵy Qazaq ulttyq pedagogıkalyq ýnıversıteti» KEAQ dırektorlar Keńesiniń tóraǵasy Gúlmıra Isımbaeva jáne taǵy basqalar bar.

Mahmud Qasymbekov Qazaqstannyń Tuńǵysh Prezıdenti Nursultan Nazarbaevtyń quttyqtaýyn jetkizip, Elbasy Berdibek Saparbaevtyń óńirde qazaqstandyqtardyń patrıottyq rýhyn nyǵaıtýǵa yqpal etetin osyndaı ıgi sharany ótkizý bastamasyn joǵary baǵalaǵanyn atap ótti.

«Týǵan jerine, halqyna degen súıispenshilikten týǵan osyndaı ıgi is-sharalar patrıottyq sezimdi kúsheıtip, jas urpaqty tárbıeleýge úlken úles qosady. Jambyl oblysynda bastalǵan forým respýblıkanyń basqa da oblystarynda óz jalǵasyn tabady dep senemin», - delingen Elbasynyń quttyqtaýynda.

Ataqty akter jáne rejısser Asanáli Áshimov forýmǵa arnaıy qatysyp, is-sharanyń mańyzdylyǵyna toqtaldy.

«Óz týǵan jerin múmkindiginshe dáriptep júrgen barsha jambyldyq túlekterdi biriktirý ıdeıasy maǵan unady. Men ózim osyndaı túlekterdiń qatarynda bolǵanymdy maqtan tutamyn», - dedi Asanáli Áshimov.

Memleket qaıratkeri Ómirbek Baıgeldi osyndaı bastamalyq is-sharany uıymdastyrǵany úshin oblys basshylyǵyna rızashylyǵyn bildirip, bul aldaǵy ýaqytta da dástúrli túrde óz jalǵasyn tabatynyna senim bildirdi.

«Áýlıeata topyraǵynan memleketimizdiń qalyptasýy men damýyna orasan zor úles qosqan jáne qosyp kele jatqan kóptegen talantty jáne áıgili el azamattar shyqty. Olardyń týǵan jerimen baılanysyn úzbeýi óte mańyzdy.

Birlesken kúsh-jigermen biz Jambyl oblysynyń damýy jolynda kóptegen ıgi isterdi atqara alatynymyzǵa senimdimin», - dedi Halyq Qaharmany, general-leıtenant Baqytjan Ertaev.

Máskeýdegi Lomonosov atyndaǵy Máskeý memlekettik ýnıversıtetiniń magıstranty Bogdan Zagrıbelnyı, sıngapýrlyq kásipker Talǵat Turymbaev, sondaı-aq AQSh, Túrkııa jáne basqa da elderden qatysýshylar onlaın rejıminde baılanysqa shyqty.

Qatysýshylardyń árqaısysy turaqty negizde týǵan mektebine, aýylyna nemese qalasyna qoldan kelgenshe kómek kórsetip júrgender. Olar qajetti qural-jabdyqtar satyp alyp, áleýmettik nysandar salýǵa qarajat bólip, kitaptar syılap otyrady.

Aımaq basshysy kezdesýge qatysýshylardy tyńdap, olarǵa týǵan mekenderi týraly umytpaǵandary, jas jerlesterimen oı bólisip, olardy úlken jetistikterge yntalandyrǵandary úshin alǵys bildirdi. Osynaý urpaqtar sabaqtastyǵy ári qaraı da saqtalýy tıis ekenin basa aıtty.

Іs-shara sońynda qatysýshylarǵa estelik músinsheler alǵys hattar tabystaldy.


Joǵary qaraı