Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Júzege asqan Joldaý: Qazaqstanda jaýapty hatshy ınstıtýty joıyldy

2021 jyldyń 31 tamyz 2021 18:36

NUR-SULTAN. QazAqparat – QR Prezıdenti Qasym-Jomart Toqaev 2020 jyldyń 1 qyrkúıegindegi «Jańa jaǵdaıdaǵy Qazaqstan: Іs-qımyl kezeńi» atty Qazaqstan halqyna Joldaýynda mınıstrlikterdegi jaýapty hatshy laýazymyn joıý týraly tapsyrma bergen bolatyn, dep habarlaıdy QazAqparat tilshisi.

«Jaýapty hatshylar ınstıtýtyna toqtalǵym keledi. Osy ınstıtýtty engizgen kezde olardyń aýyspaly bolmaýy mınıstrlerdi ákimshilik-kadrlyq jumystan bosatady, apparattyń turaqtylyǵyn qamtamasyz etedi dep qarastyrylǵan. Іs júzinde olaı bolmady. Onyń ústine mınıstrler men jaýapty hatshylar arasynda ózara túsinistiktiń bolmaýy jaǵdaıy da jıi kezdesedi. Nátıjesinde, ortaq iske nuqsan keltiriledi. Suraý bir adamnan bolýy kerek, ıaǵnı Prezıdent taǵaıyndaǵan mınıstr jaýapty bolýy tıis. Sondyqtan jaýapty hatshylar ınstıtýtyn qysqartý kerek. Olardyń mindetin mınıstrlikterdiń apparat basshylaryna júkteý qajet. Joǵaryda atalǵan usynystardy júzege asyrý úshin memlekettik qyzmet týraly zańnamaǵa jyl sońyna deıin túzetýler paketin qabyldaýdy tapsyramyn», - degen edi Qasym-Jomart Toqaev.

Osydan keıin mınıstrlikterdegi jaýapty hatshy ınstıtýtyn qysqartylatynyna qatysty pikir bildirgen QR Memlekettik qyzmet isteri agenttiginiń tóraǵasy Anar Jaıylǵanova bul jaıt memlekettik apparattyń jumysyna áser etpeıtinin basa aıta kele Prezıdenttiń mundaı qadamǵa nelikten barǵandyǵyn málim etken edi.

«Mınıstrlikterdegi jaýapty hatshylardyń jumysy memlekettik apparattyń turaqtylyǵyn qamtamasyz etip, bılik vertıkalin bekemdeıdi, Prezıdent Ákimshiliginiń jeke vedomstvolarǵa baqylaýyn kúsheıtip, mınıstrlerdi ákimshilik-kadrlyq jumystardan bosatyp, olardyń negizgi kúsh-qýatyn saıası mańyzy bar isterge jumyldyrady dep kúttik. Sonymen birge jaýapty hatshylar ınstıtýtynyń negizgi tapsyrmasy – saıası memlekettik qyzmetshiler aýysqan jaǵdaıda memlekettik organdardyń kadrlarynyń saqtalýyn qamtamasyz etý edi. Alaıda memlekettik qyzmettegi kareralyq modelge aýysýymen bul qural óziniń mańyzdylyǵyn joǵaltyp aldy», - degen edi agenttik tóraǵasy.

Osydan keıin bul iske QR Memlekettik qyzmet isteri agenttigi shuǵyl kirisip, qysqa ǵana merzimniń ishinde «Qazaqstan Respýblıkasynyń Úkimeti týraly» Qazaqstan Respýblıkasynyń Konstıtýtsııalyq zańyna ózgerister engizý týraly» QR Konstıtýtsııalyq Zańyn ázirlep, ony Májilis maquldap, Senat qabyldaǵan bolatyn.

«Qazirgi ýaqytta jaýapty hatshylardy Prezıdent taǵaıyndaıdy jáne olar tıisinshe joǵary statýsqa ıe. Osy túzetýler qabyldanǵannan keıin olardyń mindetteri apparat basshylaryna júkteledi. Apparat basshylaryn mınıstrler taǵaıyndaıdy jáne olarǵa esepti bolady. Osyǵan baılanysty, «Qazaqstan Respýblıkasynyń Úkimeti týraly» Konstıtýtsııalyq Zańnan jaýapty hatshylardyń mártebesi men ókilettikterin retteıtin normalardy alyp tastaý jáne olardy «Memlekettik qyzmet týraly» zańda apparat basshylaryna bekitý usynylady», - degen edi Senattyń jalpy otyrysynda qujatty tanystyrǵan QR Memlekettik qyzmet isteri agenttiginiń tóraǵasy Anar Jaıylǵanova.

Atalǵan zańdy qabyldaý nátıjesinde memlekettik apparattyń turaqtylyǵy, memlekettik organdardyń birinshi basshylarynyń jaýapkershiliginiń artý, memlekettik organdardyń jumysyndaǵy kadrlyq sabaqtastyqtyń saqtalýy kútiledi.

Osylaısha, «Qazaqstan Respýblıkasynyń Úkimeti týraly» Konstıtýtsııalyq Zańynan jaýapty hatshylardyń mártebesi men ókilettikterin retteıtin normalar alynyp tastalyp, apparat basshylaryna qatysty normalar «Memlekettik qyzmet týraly» Zańymen bekitildi. Sondaı-aq, apparat basshysy men mınıstr arasynda laýazymdyq ókilettikter men jaýapkershiliktiń arajigin ajyratý boıynsha tıisti zańnamalyq túzetýler engizildi. Osyǵan baılanysty, jaýapty hatshylardyń ókilettikterin mınıstrlik apparattarynyń basshylaryna júkteýdi kózdeıtin Prezıdenttiń birqatar jarlyqtaryna tıisti túzetýler engizildi.

Al 2021 jyldyń 18 qańtarynda Memleket basshysy Qasym-Jomart Toqaev «Qazaqstan Respýblıkasy Prezıdentiniń keıbir jarlyqtaryna ózgerister men tolyqtyrýlar engizý jáne Qazaqstan Respýblıkasy Prezıdentiniń keıbir jarlyqtarynyń kúshi joıyldy dep taný týraly» Jarlyqqa qol qoıdy. Nátıjesinde Qazaqstanda mınıstrlikterdegi jaýapty hatshylar ınstıtýty resmı túrde joıyldy.


Joǵary qaraı