Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

«Jyl volonteri» baıqaýynyń jeńimpazdary belgili boldy

2021 jyldyń 2 jeltoqsan 2021 20:30

PAVLODAR. QazAqparat - Pavlodar oblysy Qazaqstannyń eń belsendi volonterlerin, volonterlik uıymdardyń múshelerin, sheteldik volonterler uıymdarynyń ókilderin jáne «Qaıyrymdy ister marafony» qatysýshylarynyń basyn qosty, dep habarlaıdy QazAqparat tilshisi.

Atap aıtar bolsaq, búgin, ıaǵnı 2 jeltoqsanda Pavlodar qalasyndaǵy Jastar bastamalaryn damytý ortalyǵynda arnaıy is-shara ótti.

Munda volonterler men is-sharaǵa qatysýshylar úshin bir ýaqytta sheberlik sabaqtary men vork-shoptar ótkizildi.

Alańdarda «Ulttyq Delfıı komıteti» KQ dırektory, «Erekshe akterler teatry» múmkindigi shekteýli balalardy áleýmettik qoldaý jónindegi oqý quralynyń avtory Quralaı Túspekova, kommýnıkatsııa jónindegi maman Álisher Elikbaev, medıtsına doktory, bıolog, ǵylymı popýlıarızator jáne «MedSupportKZ» QQ dárigerleri men ǵalymdary qaýymdastyǵynyń basshysy Botagóz Kaýkenova jáne basqalar dáris oqydy.

Tyńdaýshylar úshin mentorlar men trenerler memlekettik, orys jáne aǵylshyn tilderinde «Ekologııa ómir salty retinde», «ETNO baǵyttaǵy jobalar», «Tótenshe jaǵdaıdaǵy eriktilik», «Fandreızıng», «Inklıýzıvti qoǵamdastyq», «ERG KÁJ kóshbasshysy retinde», «Kommertsııalyq emes sektorǵa arnalǵan marketıng», «Jobalyq basqarý», «Granttyq qarjylandyrý», «Halyqaralyq volonterlik», «Inklıýzıvti teatr», «Volonterlik jelilerdi uıymdastyrý», «Medıtsınadaǵy volonterlik» taqyryptarynda dárister men trenıngter ótkizdi.







Sonymen qatar, munda «Jyl eriktisi» halyqaralyq baıqaýynyń jeńimpazdaryna, sondaı-aq BUU eriktiler baǵdarlamasynyń 50 jyldyǵyna oraı bekitilgen syılyqtyń ıegerlerine qurmet kórsetildi.

Jyldyń úzdik eriktilerin Aqparat jáne qoǵamdyq damý vıtse-mınıstri Bolat Tilepov arnaıy quttyqtady.

«Qazirgi zamanda erikti bolý – erlikpen teń. Volonterlerdiń arqasynda qoǵamnyń eń ózekti áleýmettik-turmystyq máseleleri sheshilip, qorshaǵan ortamyz kún saıyn jaqsarýda. Bul qanymyzǵa sińgen asyl qasıetterimizdiń sarqylmaǵanyn kórsetedi.

Sizderdiń qoǵamdyq qyzmetterińiz aldaǵy ýaqytta volonterlik salasyn zańǵar bıikterge shyǵaratynyna senimdimiz.

Aıtýly sátti paıdalana otyryp, «Jyl volonteri» halyqaralyq syılyǵynyń bıylǵy jeńimpazdaryn shyn júrekten quttyqtaımyn», - dedi Bolat Tilepov quttyqtaý barysynda.

Vıtse-mınıstr, sondaı-aq, volonterlerdi qoldaý baǵytynda memleket júrgizip jatqan jumysqa da toqtalyp ótti.




«Ózderińizge málim, Prezıdent nusqaýy boıynsha úsh jylǵa arnalǵan volonterlikti damytýdyń Jol kartasy qabyldandy. Sonymen birge, volonterlikti qoldaý Standarty men Volonterlerdi arnaıy daıarlaý baǵdarlamasy ázirlenip jatyr. Volonterlikti yntalandyrýǵa baǵyttalǵan birqatar zańnamalyq jańashyldyqtar Parlamentte qaralyp otyr. Atqarylyp jatqan jumys volonterlikke degen qyzyǵýshylyqty oıatyp, árbir azamattyń boıynda týǵan eline degen janashyrlyq sezimin qalyptastyrýǵa baǵyttalady. Táýelsizdiktiń 30 jyldyǵy men Halyqaralyq eriktiler kúni qarsańynda elimizdiń bolashaǵy úshin jan aıamaı eńbek etip júrgen barlyq volonterge tolaǵaı tabys tileımin», – dep túıindedi sózin ol.

Azamattyq bastamalardy qoldaý ortalyǵynyń tóraǵasy Lıma Dıas eriktilerdiń qyzmeti eldegi ózara kómek mádenıetin damytý úshin óte mańyzdy ekendigin atap ótti.

«Memleket basshysy Qasym-Jomart Toqaevtyń bastamasynyń arqasynda 2020 jyly atap ótilgen eriktiler jyly elimizdiń barlyq volonterlik uıymdary belsendi at salysqan «Qaıyrymdy ister marafony» respýblıkalyq jobasy túrinde qısyndy jalǵasyn tapty. Búgin bárimiz birge jomarttyq pen meıirimdilik ıdeıasyna negizdelgen jańa qoǵam quryp jatyrmyz. Bul qoǵamda ár qazaqstandyq jasy men áleýmettik mártebesine qaramastan ómiriniń bir bóligine jaqsylyq jasaýǵa umtylady», - dedi ol.




Aıta keteıik, «Jyl volonteri» – áleýmettik jáne qoǵamdyq mańyzy bar mindetterdi sheshýge úles qosqan volonterler men eriktiler tobyn, otandyq jáne halyqaralyq volonterlik uıymdardy kótermeleýge baǵyttalǵan Halyqaralyq syılyq.

Baıqaýǵa álemniń túkpir-túkpirinen kelgen úmitkerler qatysa aldy.

Baıqaý qorytyndysyna sáıkes «Úzdik volonterlik uıym» ataǵyna «ASAA» Shymkent qalasynyń Access túlekteri» JQB, «JasStar» volonterlik jelisi (Qaraǵandy oblysy), «Jeruıyq Kegen jastary» QB (Almaty oblysy) ıe boldy.

Álııa Sátbaeva (Almaty oblysy), Dıana Ikonnıkova (Shymkent), «Іle júregi» eriktiler toby (Almaty oblysy), Jandos Ábdijapparov (Almaty oblysy) «Korporatıvtik eriktiliktiń kóshbasshylary» atandy.

«Koronavırýstyq ınfektsııamen kúreske qatysqany úshin» halyqaralyq syılyqpen Qaısar Qarqyn (Nur-Sultan), Tamerlan Tursynbekov (Qaraǵandy), Saıat Qanatuly (Almaty oblysy) marapattaldy.




«Turaqty damý maqsattarynyń kóshbasshylary» bolyp Dılıara Beǵalyqyzy (Almaty), Danıl Tsoı (Bishkek), «Dobraıa planeta» QQ (Petropavl) tanyldy.

«Eń úzdik áleýmettik kómekshiler» degen ataqqa «Dar» QQ (Nur-Sultan), Janerke Bekseıitova (Taldyqorǵan), «Astana Qaıyrymdy Jandary» QB (Nur-Sultan) ıe boldy.

Dastan Erýbaev (Almaty oblysy), «Úmit» eriktiler toby (Almaty oblysy), Álibek Musa (Almaty oblysy) «Tótenshe jaǵdaılardy joıýǵa belsendi qatysqany úshin» syılyqty enshiledi.

«Habar-osharsyz ketken adamdardy izdeýge belsendi qatysqany úshin» marapatyn Matveı Shvedın (Taldyqorǵan), «Dos» izdestirý-qutqarý jasaǵy (Qostanaı) jáne «Astana eriktileri» Nur-Sultan qalasy boıynsha LIDER.KZ QB ıe boldy.

Halyqaralyq syılyqty «Quqyq buzýshylyq qurbandaryna kómek kórsetýge belsendi qatysqany úshin» Baıan Medeýbaeva (Almaty oblysy) aldy.

«Densaýlyq saqtaýdy damytýǵa belsendi qatysqany úshin» marapatyna «Medıtsına jastar» RQB (Nur-Sultan), Dana Bekturǵanqyzy (Almaty oblysy), Madına Sovet (Almaty oblysy), Áıgerim Ponomareva (Almaty oblysy) laıyq dep tanyldy. «Meıirim-2020» eriktiler qozǵalysy (Taldyqorǵan), Ekaterına Ýshakova (Shymkent), Indıra Isabaeva (Almaty) «Salaýatty ómir saltyn nasıhattaýǵa belsendi qatysqany úshin» syılyǵymen marapattaldy.

«Bilimdi nasıhattaýǵa qosqan úlesi úshin» syılyǵyn Uljan Botbaeva (Almaty oblysy), Damır Nurkejanov (Almaty oblysy), Sandýǵash Amanqul (Shymkent), «Beıbitshilikti, dostyq pen kelisimdi nyǵaıtýǵa qosqan úlesi úshin» syılyǵyn Marııa Gorbacheva (Semeı), Rýfına Ýsanova (Taldyqorǵan), Móldir Tileýbaı (Almaty oblysy) aldy.




«Aqtóbe, tynys al» qozǵalysy (Aqtóbe), «EcoArsu» eriktiler klýby (Aqtóbe), Dıana Myrzaǵalıeva (Nur-Sultan) «Qorshaǵan ortany saqtaýǵa jáne qorǵaýǵa qosqan úlesi úshin» marapatyna ıe boldy.

«Tarıhı-mádenı murany saqtaýǵa jáne damytýǵa qosqan úlesi úshin» syılyqpen «Maıdan joly» Pavlodar izdestirý zertteý jasaǵy» QB, Ámına Qarjaýbaeva (Almaty oblysy), Gúlzat Mámetnurqyzy (Qaraǵandy oblysy) marapattaldy.

«Zoologııalyq qorǵaý máselelerin sheshýge qosqan úlesi úshin» Veronıka Gýzenko (Taldyqorǵan), «Meıirimdi qol» janýarlarǵa kómek kórsetýge arnalǵan qoǵamdyq qaıyrymdylyq qory (Pavlodar), Lázzat Qulbaeva (Aqmola oblysy) marapatty enshiledi.

«Áleýmettik mindetterdi sheshýge qosqan úlesi úshin» syılyǵymen Áset Sultanuly (BQO), Sergeı Kýrılov (Qaraǵandy), Soltústik Qazaqstan oblysyndaǵy Tahmeov ardagerler keńesiniń janyndaǵy «Kúmis volonter» toby (Petropavl) marapattaldy.

Sharany Aqparat jáne qoǵamdyq damý mınıstrligi uıymdastyrdy.

Ol Eýrazııalyq toptyń qoldaýymen jalpyulttyq joba «Qaıyrymdy ister marafony» aıasynda ótti.
















Joǵary qaraı