Погода
Астана +7 °С
Алматы +14 °С
Курс валют
USD 421.58
EUR 496.83
RUB 5.53
CNY 62.20

2024 жылы ішкі нарықты негізгі азық-түлікпен толық қамтамасыз етеміз – Асқар Мамин

21 Июня 2021 11:05

НҰР-СҰЛТАН. ҚазАқпарат – Биыл 2 ет комбинаты, 5 құс фабрикасы салынады. Бұл туралы ҚР Парламенті палаталарының бірлескен отырысында Премьер-Министр Асқар Мамин айтты, деп хабарлайды ҚазАқпарат тілшісі.

«Азық-түлік қауіпсіздігі деңгейін арттыру жұмысы белсенді жүріп жатыр. 29 негізгі азық-түлік тауарының 11-і - 100 пайыздан аса қамтамасыз етілген, ал 12 тауар бойынша – 80 пайыздан артық. 6 тауар бойынша импортқа тәуелділік бар. Оны азайту үшін азық-түлік тауарлары өндірісін ұлғайту бойынша кешенді жоспар іске асырылып жатыр», - деді Асқар Мамин.

Үкімет басшысының дерегінше, биыл 35 сүт-тауарлы ферманы, 2 200 гектар бау-бақша, 2 ет комбинатын, 5 құс фабрикасын, 4 балық өндірісі объектісін іске қосу жоспарланған.

«Сонымен қатар 2022-2023 жылдары тағы 70 сүт-тауарлы фермасын, 4 400 гектар бау-бақша, 4 ет комбинатын, 6 құс фабрикасын, 4 балық өндірісі объектісін және бір қант зауытын іске қосу жоспарланған. Осының барлығы 2024 жылға қарай негізгі азық-түлік тауарлары бойынша ішкі нарықты толық өзін-өзі қамтамасыз етуге мүмкіндік береді», - деді Премьер-Министр.

Оның атап өтуінше, биыл мамырда азық-түлік тауарларының бағасы әлемде жылдық мәнде шамамен 40 пайызға өсті.

«Ал Қазақстанда қабылданған шаралардың арқасында азық-түлік инфляциясы 9,3 пайызды құрады. Осы бағыттағы жұмыс одан әрі жалғасады», - деді ол.


Наверх