Погода
Нур-Султан +7 °С
Алматы +14 °С
Курс валют
USD 449.85
EUR 485.43
RUB 5.71
CNY 70.69

ەلوردادا 3 جاسار قىزدى قۇتقارۋعا قاتىسقان ءۇشىنشى جىگىت تابىلدى

20 Мая 2022 14:04

نۇر- سۇلتان. قازاقپارات - نۇر- سۇلتان قالاسىندا 8-قاباتتان قۇلاپ كەتە جازداعان كىشكەنتاي قىزدى قۇتقارۋعا قاتىسقان ءۇشىنشى جىگىت انىقتالدى. بۇل تۋرالى حابار ارناسىنداعى «ايتىلماعان اڭگىمە» باعدارلاماسىندا بەلگىلى بولدى.

ەلوردالىق ءبۇلدىرشىندى قۇتقارۋعا ات سالىسقان تاعى ءبىر جىگىتتىڭ ەسىم - نۇرايدىن مارات. ول قاراعاندى ۋنيۆەرسيتەتىنىڭ ماتەماتيكا جانە اقپاراتتىق تەحنولوگيالار فاكۋلتەتىندە 2-كۋرستا وقيدى. سول كۇنى نۇرايدىن ءسابيت جانە ساعيمەن بىرگە قىزدى امان الىپ قالۋ ءۇشىن بارىن سالعان. باعدارلاما جۇرگىزۋشىسىنىڭ سوزىنشە، ستۋدەنت جىگىت ءسابيت قۇلاپ كەتپەس ءۇشىن تەرەزەنى قولىمەن تىرەپ تۇرعان. ءدال سول كۇنى ول سەسسياعا اسىعىپ بارا جاتقان ەكەن.

«سول كۇنى مەن قاراعاندىداعى وقۋىما، سەسسياعا اسىعىپ بارا جاتتىم. بۇل وقيعا كۇندىزگى ون جارىم شاماسىندا بولدى. ول جەردە ءبارىمىزدىڭ ويىمىز سول بالانى قۇتقارۋ ەدى. سول كۇنى تاڭەرتەڭ ۇيگە تاكسي شاقىرىپ قويعانبىز. ءبىر كەزدە قىزدىڭ جىلاعان داۋىسى ەستىلدى، جان- جاعىمىزعا قاراپ، ءىلىنىپ تۇرعان قىزدى كوردىك. اعام بىردەن سول جاققا جۇگىرىپ كەتتى. مەن دە ىشكە كىردىم. ەڭ العاش ءبىز سەگىزىنشى قاباتقا كوتەرىلدىك. وندا ەسىكتى بۇزىپ جاتقان كىسىلەردى كوردىك. ول جاقتاعىلار مەنى جەتىنشى قاباتقا جىبەردى. استىنداعى پاتەردىڭ ەسىگى اشىق ەكەن. بالكونعا كىرىپ، تەرەزەدەن قارادىم، بالا تۇر ەكەن. سىرتتا تۇرعان كىسىلەر ماعان تەرەزەنى بۇز دەدى. تەپتىم، ۇردىم، سىنبادى. سول ۋاقىتتا ءسابيت پەن ساعي كىرىپ كەلدى. ءسابيت دەگەن كىسى تەرەزەنى 4-5 رەت تەپتى. ارتىنشا ويلانباستان تەرەزەگە شىقتى. ءبىز ساعي دەگەن كىسى ەكەۋىمىز سول جەردە ونىڭ اياعىنان ۇستاپ، كومەك بەردىك. ول كىسى بالانى ەرلىكپەن قۇتقارىپ الدى، بالانى كورشى ايەلگە قالدىردىق تا، بىردەن سىرتقا شىعىپ كەتتىك»، - دەپ باياندادى بولعان جايتتى نۇرايدىن.

نۇرايدىنىڭ وقيعا ورنىندا بولعانىن ساعيدىڭ ءوزى دە ۆيدەوسىندا راستاعان. ساعي ىشتە تەرەزەنى ءبىر كىسى ۇستاپ تۇرعانىن ايتقان ەكەن. وسى رەتتە باعدارلاما جۇرگىزۋشىسى باتىرجان يبراگيم ستۋدەنت جىگىتتى ەل ءبىلىپ ءجۇرسىن دەپ، ءوزى ءوتىنىپ ۆيدەوعا تۇسىرگەنىن العا تارتادى.

«قاراپايىم جىگىت. ستۋدەنت. ءوزىم تۇسەمىن دەگەن جوق. ءوزىم تۇسىرەيىن دەدىم. وسىنداي جىگىتتەردى ەل تانىسىن دەدىم. اتا- اناسى دا قۋانىپ ءجۇرسىن. جارايسىڭ، نۇرايدىن! بۇل جىگىتكە مەدال، ەشنارسە كەرەك ەمەس! ەرەكشە قۇرمەتتىڭ دە كەرەگى جوق! تەك ەل ءبىلسىن دەپ كورسەتتىم»، - دەيدى ول.

ەسكە سالساق، 11- مامىر كۇنى ەلورداداعى قامال تۇرعىن ءۇي كەشەنىنىڭ 8-قاباتىندا سالبىراپ تۇرعان كىشكەنتاي قىزدى استاناعا جۇمىس ىستەۋگە كەلگەن قىزىلوردالىق جىگىتتەر قۇتقارىپ قالعان بولاتىن. ولاردىڭ ەرلىگى ەلەنىپ، پاتەر بەرىلىپ، سونداي- اق ءسابيت پەن ساعي «توتەنشە جاعدايداعى ەرلىگى ءۇشىن» توسبەلگىسىمەن ماراپاتتالدى.

اۆتور: ەلميرا اسقار قىزى

https://kaz.nur.kz




Ключевые слова: قوعام,
Наверх